Լեռնային Ղարաբաղ. Անուշադրութեան մատնուած պատերազմի թատերաբեմ (իրազեկման ձեռնարկ Պրիւքսէլի մէջ)

Ի յիշատակ երկրորդ արցախեան պատերազմի զոհերու տարելիցին, սեպտեմբեր 30-ին, Պրիւքսէլի Իքսէլ համայնքի ամենաբանուկ հրապարակներէն մէկուն վրայ տեղի ունեցաւ «Լեռնային Ղարաբաղ. անուշադրութեան մատնուած պատերազմի թատերաբեմ» խորագրով բացօթեայ ցուցահանդէսի բացման պաշտօնական արարողութիւնը, որ ուղեկցուեցաւ հայկական երաժշտական երեկոյով:

Տարեսկզբին Իքսէլ համայնքի բնակչուհի Լիզա Ապաճեանի կողմէ ներկայացուած միջնորդագրին շնորհիւ՝ համայնքը նախաձեռնած էր բնակչութեան իրազեկման ձեռնարկներու շարք, որուն միացած էին նաեւ Պելճիքայի Հայերու կոմիտէն (CAB) եւ Հայկական բարեգործական ընդհանուր միութիւնը (AGBU)։

Իքսէլի թաղապետ Քրիստոս Տուլգերիտիս իր ելոյթին մէջ նշեց, որ իրազեկման այս ձեռնարկը կարեւոր նշանակութիւն ունի ինչպէս հայ համայնքին, անպէս ալ տեղաբնակ հասարակութեան համար. «Շատ ամուր կապ կայ Իքսէլսի եւ հայ համայնքի միջեւ: Այս կապը յատկապէս կ՝արտացոլուի Անրի Միշոյի հրապարակին հանգրուանած Հայոց Ցեղասպանութեան յուշարձանին առկայութեամբ: Հետեւաբար, բնական է, որ Իքսէլսը զգօնութեան եւ իրազեկման դերակատարում կը ստանձնէ Լեռնային Ղարաբաղի մէջ տեղի ունեցող այս ողբերգութիւններուն առջեւ»:

Նկարները տեղադրուած էին արդէն սոյն թուականի Սեպտեմբեր 27-ին, որոնց առջեւ ալ նոյն օրը, Պելճիքայի հայերու կոմիտէն կազմակերպած էր մոմավառութիւն ի յիշատակ պատերազմի զոհերուն:

Նկարներու ցուցադրութեան հեղինակներն էին երկու տաղանդաւոր լուսանկարիչներ՝ Ռոպերթօ Դրաւանը Իտալիայէն եւ Օլիւյէ Պապենիէն Պելճիքայէն, որոնք ներկայ եղած են պատերազմի ժամանակ եւ իրենց աշխատանքներուն մէջ կը փաստեն հակամարտութեան դաժան առօրեան եւ հետեւանքները։

Պելճիքայի հայերու կոմիտէի նախագահ Նիկոլա Դաւիթեան իր խօսքին մէջ շնորհակալութիւն յայտնեց Իքսէլի համայնքին ձեռնարկի նախաձեռնման եւ կազմակերպման համար եւ նշեց. «Խօսքը չի վերաբերիր միան հայերուն, քանզի գալիք աշխարհը պիտի ըլլայ այնպիսին, ինչպիսին մենք կը կառուցենք. ուժի, պատերազմներու եւ անտարբերութեան աշխարհ, թէ՛ մարդասէր եւ միասնական: Ընտրութիւնը մերն է»։

ԱՐՄԻՆԷ ՀԱՐԷՅԵԱՆ

Yerakouyn.com 

Leave a Reply

Your email address will not be published. Required fields are marked *