Զարաքօլու Եւ Կիւլեր Կը Դատապարտուին

ՊՈԼԻՍ.-Հինգշաբթի, Մարտ 10ին, թրքական ատեան մը մէկ տարուան եւ երեք ամսուան բանտարկութեան դատապարտեց հեղինակ Մեհմետ Կիւլերը, իսկ քիւրտերու մասին անոր հեղինակած գիրքը հրատարակած Ռակըպ Զարաքօլուն 10,000 եուրոյի տուգանքի ենթարկուեցաւ:
Անոնք կը դատուին անցեալ Սեպտեմբերէն ի վեր, եւ անհիմն կը համարեն իրենց դէմ կատարուած այն ամբաստանութիւնները, թէ քրտական անջատողական շարժումին ի նպաստ քարոզչութիւն կատարողներ են:
Յայտնենք, թէ անցեալ տարուան Մայիսին լոյս տեսած գիրքը իշխանութեանց կողմէ անմիջապէս արգիլուեցաւ եւ գրաւուեցաւ:
Կիւլեր նոյն ատեանին կողմէ մէկ տարուան եւ երեք ամսուան բանտարկութեան դատապարտուեցաւ, այլ հատոր մը հեղինակած ըլլալու «յանցանքով»:
Յիշեցնենք, թէ Հայկական Ցեղասպանութեան մասին հրատարակութեանց համար հալածուող Զարաքօլու, անցեալ ամիս մեծարուած էր Հայաստանի մէջ տեղի ունեցած շարք մը ձեռնարկներու ընթացքին:

http://asbarez.com/arm/94121/

Leave a Reply

Your email address will not be published. Required fields are marked *