Ինքզինք «Խաղաղութեան դեսպան» կոչող թուրք քրէական հեղինակութիւնը մտադրած է աԱյցելել Հայաստան

Թուրքիոյ յայտնի քրէական հեղինակութիւն Սետաթ Փեքեր յայտարարած է, որ մտադիր է Հայաստան այցելել: «Սփութնիք Արմենիա» կը հաղորդէ, որ ան այս մասին գրած է «Թուիթըր»-ի վրայ:

«Ընկերնե՛ր, դուք կ՛ըսէք, որ Սետաթ Փեքերը ըրած է այն, ինչ որ ընդդիմութիւնը 20 տարուան ընթացքին չէ կրցած ընել, եւ ես ալ ձեզի կ՛ըսեմ` ժողովուրդին ծառայութիւնս տակաւին չէ աւարտած: Ես կը մեկնիմ Սուրիա` նպաստելու արտաքին քաղաքականութեան: Այնտեղէն պիտի մեկնիմ Կիպրոս, Յունաստան եւ Հայաստան», գրած է Փեքեր` ինքզինք կոչելով «համաշխարհային խաղաղութեան դեսպան»:

Յունուար 2020-ին Թուրքիայէն փախուստ տուած Փեքերի անունը թուրք հասարակութեան շատ ծանօթ է: Փեքեր թրքական յանցագործ աշխարհի գլխաոր հեղինակութիւններէն մէկը կը նկատուի: 49 տարեկան Փեքեր բազմիցս դատապարտուած է քրէական գործունէութեան համար:

Համացանցի վրայ անոր ժողովրդականութիւնը բարձրացած է վերջին ամիսներուն` «ԵուԹիուպ»-ի շարք մը տեսաուղերձներէն ետք:

Իր արտասանած խօսքերուն մէջ ան լուրջ մեղադրանքներ կը ներկայացնէ Թուրքիոյ իշխող Արդարութիւն եւ բարգաւաճում կուսակցութեան քաղաքական գործիչներուն հասցէին:

Անոր համաձայն, Թուրքիոյ իշխող շրջանակներու ներկայացուցիչները մասնակից են սպանութիւններու, բռնաբարումներու, թմրեցուցիչներու մաքսանենգման, պաշտօնական դիրքի չարաշահման եւ բազմաթիւ այլ յանցագործութիւններու մէջ:

https://www.aztagdaily.com/archives/522145 

Leave a Reply

Your email address will not be published. Required fields are marked *