Մուսա Լերան բարձունքին տաղաւարի ս․ պատարագ

Ս. Կոյս Աստուածածնի Վերափոխման տաղաւարը յատուկ հանդիսութեամբ կը նշուի Մուսա Լերան Վագըֆ գիւղի Սուրբ Աստուածածին գողտրիկ եկեղեցւոյ մէջ։ Այս տարի եւս, հակառակ համավարակի պայմաններուն, Ն.Ա.Տ. Սահակ Բ. Պատրիարք Հօր բարձր նախագահութեամբ 15 օգոստոս, կիրակի առաւօտ տաղաւարի Ս. Պատարագ մատուցուեցաւ գիւղի եկեղեցւոյ մէջ։

Ս. Պատարագը մատոյց Հաթայի շրջակայից հոգեւոր հովիւ Արժ. Տ. Աւետիս Քհնյ. Թապաշեան։ Ս. Սեղանին սպասարկեցին Բրկ. Առէն Ուր. Դպիր Քուշ, Բրկ. Միսաք Ուր. Դպ. Հէրկէլեան եւ Բրկ. ԵուսուֆԴպ. Թապաշեան։

Երգեցողութիւնը կատարուեցաւ Արժ. Տ. Տրդատ Աւ. Քհնյ. Ուզունեանի առաջնորդութեամբ, ներկայ հոգեւորականներու եւ ուխտաւոր դպիրներու մասնակցութեամբ։

Համավարակի պատճառաւ այս տարի թէեւ խրախճանքներ չկային, սակայն կիրակնօրեայ արարողութեան ներկայ էին բազմաթիւ ուխտաւորներ եւ Հաթայ նահանգի զանազան շրջաններէն հայորդիներ, ինչպէս նաեւ Ատանայէն եւ Մերսինէն արենակիցներ։ Համավարակի կանոններուն ուշադիր ըլլալու նախապատուութեամբ, լեցուն էր փոքրիկ աղօթատունն ու բակը։

Ի ժամ Ս. Պատարագի քարոզեց Ամեն. Ս. Պատրիարք Հայրը եւ բացատրեց օրուան տօնի նշանակութիւնն ու կարեւորութիւնը։ Մեր Հոգեւոր Պետը յայտնեց, թէ՝ Պոլսոյ հայութիւնը յոյս ունիՎաքըֆ գիւղի ապագային համար եւ այս պատճառաւ է, որ համավարակի այս դժուարին օրերուն իսկ հաւատացեալներ փութացած են գիւղ, ուրախակից ու զօրակից ըլլալու համար գիւղի բնակիչներուն։Պատրիարք Հայրը, նաեւ յիշեցուց, թէ՝ ո՛չ միայն Պոլսոյ, այն նաեւ համայն հայութեան համար կարեւոր համայնք մըն է Վաքըֆգիւղցին, հանդերձ իր կեանքով։ Աստուածամօր ննջումին եւվերափոխման ակնարկելով, յիշեցուց որ հաւատքի եւ սիրոյ պտուղը կը վայելէր Աստուածածինը։Ուստի, նման հաւատքի եւ սիրոյ հրաւիրեց նաեւ ներկաները եւ յատկապէս գիւղացիները, որպէսզի շարունակեն իրենց առօրեան։

Նորին Ամենապատուութիւնը քարոզի աւարտին գովեց Իսքէնտէրունի Ս. Քառասնից Մանկանց Եկեղեցւոյ սպասաւորներէն Բրկ. Եուսուֆ Դպ. Թապաշեանին աշխատասիրութիւնն ու եկեղեցական ծառայութիւնը եւ ուրար կրելու արտօնութիւն շնորհեց երիտասարդ դպիրին։

Գրեթէ բոլոր ներկաներ Սուրբ Հաղորդութիւն ստացան։ Ս. Պատարագի աւարտին, մեր ՀոգեւորՊետը թափօրով առաջնորդուեցաւ եկեղեցւոյ բակը, ուր նախագահեց առաջ Խաղողօրհնէքի եւ ապա աւանդական Հերիսա օրհնէքի արարողութիւններուն։ Հանգստեան աղօթքով յիշուեցան Մուսա Լերան գիւղերու համայն հանգուցեալ բնակիչները։

Ապա ներկաներ ստացան մինչեւ առտու եփող հերիսայէն իրենց բաժինները։

Եկեղեցական հանդիսութեանց աւարտին, տեղւոյն սրահին մէջ Նորին Ամենապատուութեան այցելութիւն մը տուին Իսլահիյէի Քաղաքապետ Քէմալ Վուրալ, Սամանտաղի Քաղաքապետ Զիւլֆիքար Եըլմազ։ Ընդունելութեան մասնակցեցան նաեւ Միհրան Ուլիկեան, Վաքըֆ գիւղի եւԻսքէնտէրունի եկեղեցեաց վարչութեանց անդամներ։

ՊԱՏՐԻԱՐՔ ՀԱՅՐԸ ԺՈՂՈՎՈՒՐԴԻՆ ՀԵՏ

Կիրակնօրեայ ոգեւորիչ տօնախմբութեան յաջորդող ժամերուն, Աւետիս Քահանայի կազմակերպութեամբ հետաքրքրական ու իմաստալից զրոյցի երեկոյ մը տեղի ունեցաւ։ Գիւղի բնակիչները ի մի համախմբուեցան եւ միասնական հանդիպում ունեցան Պատրիարք Հօր հետ։  Հանդիպման ընթացքին, անոնք ամենայն հարազատութեամբ գիւղին հարցերը եւ կարիքները Նորին Ամենապատուութեան ուշադրութեան յանձնեցին։ Մեր Հոգեւոր Պետը, գիւղացիներուն արտայայտութիւնները մի առ մի լսելե յետոյ, շեշտադրեց սիրոյ կարեւորութիւնը եւ իր հայրական խրատները փոխանցեց ներկաներուն։ Յիշեցուց, թէ՝ գիւղը որպէսզի բարձր պատնէշի վրայ մնայ, անհրաժեշտ է սիրոյ մէջ համագործակցութիւնն ու միաբանութիւնը։ Այս առթիւ, Պատրիարք Հայրը նաեւ կարեւորութիւնը ընդգծեց սոյն հանդիպման եւ ըսաւ. «Այստեղ եկած ենք, եկեղեցին այցելելու եւ տօնախմբութեան մասնակցելու։ Սակայն նոյնքան կարեւոր է, Վաքըֆ գիւղի ժողովուրդին հետ համախմբուիլ եւ անոնց հետ զրուցելու առիթներ ստեղծել։ Հետեւաբար, շէնքերու առընթեր ժողովուրդի անհատները եւս մեծապէս կարեւորութիւն ունին»։ Պատրիարք Հայրը, յաջորդաբար կարեւորեց գիւղէ ներս մնայուն հոգեւոր սպասաւորի ներկայութիւնը եւ շարունակեց իր խօսքերուն. «Հաթայի շրջանը բախտաւոր է, քանի որ Տ. Աւետիս Քահանայի նման աշխատասէր, յարգուած ու գործունեայ հոգեւոր հովիւ մը ունի։ Հետեւաբար, Վագըֆ գիւղը եւս լաւ պէտք է արժեւորէ իր հոգեւորհովիւին ներկայութիւնը, ըստ որում պէտք է ականջ տայ Տէր Հօր խրատներուն ու ցուցմունքներուն։Այլ խօսքով, այս գիւղի կեանքը Տէր Հօր օրհնութեան կարիքը ունի»։ Իր խօսքերու աւարտին, Պատրիարք Հայրը, նաեւ կարեւորութեամբ յիշեցուց, թէ՝ Պատրիարքական Աթոռը միշտ կը հետաքրքրուի գիւղի ժողովուրդին առօրեային հետ եւ գիւղացիներ երբ կարիքը զգան, որպէս հովանաւոր միշտ իրենց մօտ պիտի գտնեն Պատրիարքական Աթոռը եւ Պատրիարքը։

Ժողովուրդի հետ հանդիպումէ յետոյ, Պատրիարք Հօր ի պատիւ սիրոյ սեղան սարքուեցաւ։ Այս առիթով, Պատրիարք Հայրը, երիտասարդներու հետ համախմբուեցաւ։ Մեր Հոգեւոր Պետը, առաջին հերթին մեծապէս գնահատեց երիտասարդներու կատարած կազմակերպչական աշխատութիւնը եւ տօնախմբութեան առթիւ ծառայութիւնները։ Մաղթեց, որ Աստուած ալ օրհնէ երիտասարդներուն աշխատութիւնները եւ ընտանիքները։ Իրենց հայրական թելադրութիւններ ըրաւ եւ յիշեցուց, թէ՝ երիտասարդներու ներդրումը դրական իմաստով կրնայ փոխել Վաքըֆ գիւղի կեանքը։ Պատրիարք Հայրը մաղթեց նաեւ որ յաջորդ տարի համավարակը իր ազդեցութիւնը թողու եւ գիւղի մէջ տօնախմբութիւնը առաւել եւս մեծ ոգեւորութեամբ ու մասնակցութեամբ տեղի ունենայ։

https://www.facebook.com/TRArmenianPatriarchate  

Leave a Reply

Your email address will not be published. Required fields are marked *