Հովուապետական այցելութիւն դէպի Վաքըֆգիւղ

Ն.Ա.Տ. Սահակ Բ. Պատրիարք Հայրը 13 Օգոստոս 2021, Ուրբաթ երեկոյեան, Մուսա Լերան Վաքըֆգիւղի ժողովուրդին հովուապետական այցելութեան նպատակաւ օդային ճամբով մեկնեցաւ Անտիոք։ Ամենապատիւ Տիրոջ ճամբորդութեան ընթացքին կ՚ընկերանար գաւազանակիր Արժ. Տ. Շիրվան Քհնյ. Միւրզեան։

Մեր Հոգեւոր Պետը եւ իր ընկերակիցները Հաթայի օդակայանի պատուոյ սրահին մէջ դիմաւորուեցաւ Անտիոքի եւ շրջակայից Հոգեւոր Հովիւ Արժ. Տ. Աւետիս Քհնյ. Թապաշեանի, Իսկենտէրունի Ս. Քառասուն Մանկանց Եկեղեցւոյ Ծխական Խորհուրդի Ատենապետ Կարպիս Քըսատուրի, Բ. Ատենապետ Միքայէլ Թապաշի, Վաքըֆգիւղի Ս. Աստուածածին Եկեղեցւոյ Ծխական Խորհուրդի Ատենապետ Ճէմ Չափարի, Վաքըֆգիւղի Գիւղապետ Պերճ Գարթունի եւ Բրկ. Եուսուֆ Դպ. Թապաշեանի կողմէ։ Միջոց մը սրահին մէջ հանգստանալէ յետոյ, Նորին Ամենապատուութիւնն ու ընկերակիցները հասան Վաքըֆգիւղ։

ԺԱՄԱՆՈՒՄ

Նորին Ամենապատուութիւնը ժամը 21.00-ի շուրջ ժամանեց Վաքըֆգիւղ եւ դիմաւորուեցաւ գիւղացիներու կողմէ։ Վաքըֆգիւղցիներ, Պատրիարք Հայրը ողջունեցին աւանդական աղ ու հացով, ծաղիկներով ու գիւղական աւանդական տհոլ-զուրնայով եւ առաջնորդեցին դէպի Ս. Աստուածածին Եկեղեցի։

ՀՐԱՇԱՓԱՌ

Գիւղի գողտրիկ եկեղեցւոյ զանգի ղօղանջին ներքեւ Նորին Ամենապատուութիւնը Հրաշափառով մուտք գործեց եկեղեցի, ուր կատարուեցաւ կարճ աղօթասացութիւն։ Պատրիարք Հօր շքախումբին մաս կը կազմէին նաեւ Արժ. Տ. Տրդատ Աւ. Քհնյ. Ուզունեան եւ Արժ. Տ. Շահէն Քհնյ. Օհանեան։ Արարողութեան ներկայ եղան նաեւ Ս. Աստուծածին Եկեղեցւոյ սպասաւորներէն Բրկ. Առէն Ուր. Դպ. Քուշ եւ Բրկ. Միսաք Ուր. Դպ. Հէրկէլեան։

Կատարուած աղօթքէն յետոյ, յանուն տեղւոյն համայնքին, գիւղի Հոգեւոր Հովիւը բարի գալուստ մաղթեց Ամենապատիւ Տիրոջ եւ ըսաւ թէ՝ մեր Հոգեւոր Պետը երկրորդ անգամ կ՚այցելէր գիւղը։ Ինք, որպէս հոգեւոր զաւակը Նորին Ամենապատուութեան, հովուապետական այցելութեան առիթով մեծապէս ուրախ էր։

Ի պատասխան Տէր Հօր, Նորին Ամենապատուութիւնը նախ յայտնեց, թէ՝ Վաքըֆգիւղը կը մնայ թանկագին ներկայութիւն համայն հայութեան համար։ Հետեւաբար ինք փափաքը կ՚ունենայ նման առիթներով այցելել գիւղը եւ զօրաւիք կանգնիլ գիւղի ժողովուրդին։ Ապա, անդրադարձաւ Ս. Աստուածածնայ Տաղաւարի օրհնութեան եւ մաղթեց որ Տէր Աստուած օրհնութիւն շնորհէ համայն աշխարհին եւ յատկապէս գիւղի ժողովուրդին։ Պատրիարք Հայրը ուրախ էր, քանի ուշ ժամերուն գիւղ հասած ըլլալով հանդերձ, գիւղի ժողովուրդը փառաւոր պատրաստութեամբ դիմաւորած էր իրենց հովուապետը։ Այս առթիւ իր հայրական գովասանական խօսքը ուղղեց ժողովուրդին։ Իր խօսքերու աւարտին, Պատրիարք Հայրը դրուատեց նաեւ Տ. Աւետիս Քահանան եւ յաջողութիւն մաղթեց իրեն։

Արարողութիւնը իր աւարտին հասաւ, Պատրիարք Հօր վերջին օրհնութեամբ։ Ապա ի պատիւ մեր հոգեւոր պետին կատարուեցաւ համեստ հիւրասիրութիւն։

Մեր Հոգեւոր Պետը եւ ընկերակիցները պիտի իջեւանին գիւղի հիւրանոցը։

https://www.facebook.com/TRArmenianPatriarchate

 

Leave a Reply

Your email address will not be published. Required fields are marked *