Յոյս ունինք, որ Փաշինեանը կ՝արագացնէ իր ստորագրած փաստաթուղթերուն կիրառումը. Մուսթաֆա Շենթոփ

Յուլիս 27-ին, Պաքուի մէջ Թուրքիոյ, Փաքիստանի եւ Ազրպէյճանի խորհրդարաններու նախագահները ստորագրած են «Պաքուի հռչակագիրը»: Ստորագրման արարողութենէն առաջ ելոյթ ունեցած է Թուրքիոյ խորհրդարանի նախագահ Մուսթաֆա Շենթոփը եւ նշած, որ 3 երկիրները իրենց տարածաշրջաններուն մէջ մշտական բնոյթ ստացած խնդիրներու լուծման համար պատասխանատւութիւն կը կրեն: Այս մասին ԵՌԱԳՈՅՆ-ը կը տեղեկանայ Ermenihaber.am-էն։

Շենթոփ ընդգծած է, որ քաղաքական հարցերուն զուգահեռ՝ 3 երկիրներու համագործակցութեան անկիւնաքարերն են նաեւ պաշտպանութեան, փոխադրամիջոցի, տարածաշրջանային կապակցուածութեան, առեւտուրի, ուժանիւթի, կրթութեան, զբօսաշրջութեան, ՏՃ ոլորտներուն մէջ համատեղ գործունէութիւնը:

Ան «արժէքաւոր գործընթաց» որակած է համապարփակ խաղաղութեան պայմանագիր կնքելու մասին Ազրպէյճանի՝ իբրեւ յաղթած պետութեան ըրած կոչերը Հայաստանին:

«Կը հաւատանք, որ ամենաճիշտ քայլը, որ կրնայ ընել Հայաստանը, վերոնշեալ կոչին լաւ մտադրութիւնով եւ կառուցողական մօտեցմամբ պատասխանելն է: Յոյս ունինք, որ հակառակ պատերազմի պարտութեան, յունիս 20-ին վերընտրուած Փաշինեանը կ՝արագացնէ իր ստորագրած փաստաթուղթերուն կիրառումը: Եթէ այս քայլը անկեղծօրէն առնուի՝ կ՝ուզեմ կրկին յայտնել, որ Թուրքիան նմանատիպ մօտեցմամբ կը պատասխանէ»,- ըսած է Մուսթաֆա Շենթոփ։

Yerakouyn.com 

Leave a Reply

Your email address will not be published. Required fields are marked *