Հակակայկական յայտարարութեան պատճառով՝ թուրք գործիչին Գերմանիոյ մէջ մեղադրանք առաջադրուած է

Գերմանիոյ մէջ գործող Կրօնական հարցերու թուրք-իսլամական միութեան (DİTİB) նախկին ղեկավարներէն Մուսթաֆա Քեսքինին «թշնամանք եւ քինախնդրութիւն հրահրելու» մեղադրանք առաջադրուած է։ Այս մասին ԵՌԱԳՈՅՆ-ը կը տեղեկանայ Ermenihaber.am-էն։

Հասարակական ցանցերու մէջ, նախապէս, հրեաներու եւ հայերու դէմ ուղղուած վիրաւորական գրառումներ կատարելուն պատճառով՝ թուրք գործիչին դէմ հետաքննութիւն սկսած էր։ Իբրեւ արդիւնք, 2021 փետրուարին, DİTİB նախագահը հրաժարական տուած էր։

Կիոթինկենի գլխաւոր դատախազութիւնը յայտնած է, որ տեղի վարչական դատարանը՝ հինգ տարբեր հրապարակումներու առթիւ՝ Քեսքինի վերաբերեալ կազմած է մեղադրական եզրակացութիւն։ Խնդրոյ առարկայ հրապարակումները կատարուած են 2015 թուականի Մայիսէն մինչ օրս՝ Facebook-ի եւ  WhatsApp-ի մէջ։

Անոնցմէ մէկուն մէջ Քեսքինը հրապարակած էր 1981 թուականին Հռոմի Յովհաննէս Պօղոս Երկրորդ Պապի դէմ մահափորձ կատարած Մեհմետ Ալի Աղճայի եւ Հռոմի Ֆրանչիսքոս Պապի նկարը՝ գրելով․ «Պէտք չէ զարմանալ, եթէ ոեւէ մէկը կրակէ Պապի գլխուն»։ Յատկանշական է, որ այդ հրապարակումը կատարուած էր, երբ Ֆրանչիսքոս Պապը Հայոց Ցեղասպանութիւնը անուանած էր 20-րդ դարու առաջին ցեղասպանութիւն։

Yerakouyn.com 

Leave a Reply

Your email address will not be published. Required fields are marked *