Ս․ Թարգմանիչ Վարդապետներու տօնը նշուեցաւ Գնալը կղզիի մէջ

Ս. Թարգմանիչ Վարդապետներ՝ Սահակ եւ Մեսրոպի Տօնին, 24 Յունիս 2021, Հինգշաբթի առաւօտ, արարողութիւններ տեղի ունեցան Գնալը Կղզիի Ս. Գրիգոր Լուաւորիչ Եկեղեցւոյ մէջ։ Արարողութեանց նախագահեց Ն.Ա.Տ. Սահակ Բ. Պատրիարք Հայրը, մասնակեցան Եկեղեցւոյ Երէց՝ Հոգշ. Տ. Յարութիւն Աբղ. Տամատեան, Պատրիարքական Փոխանորդ՝ Արժ. Տ. Գրիգոր Աւ. Քհնյ. Տամատեան եւ Արժ. Տ. Զօհրապ Քհնյ. Ճիվանեան։ Թահաժահրի (քորոնա) համավարակի սահմանափակումներու ներքեւ կատարուած հանդիսութեան ներկայ եղան նաեւ կոկիկ թիւով հաւատացեալներ, որոնց շարքին էին վաստակաւոր կրթական մշակներ։

Ս. Պատարագը մատոյց Արժ. Տ. Կորիւն Աւ. Քհնյ. Ֆէնէրճեան։ Ս. Սեղանին սպասարկեցին Բրշ. Հրաչեայ Սրկ. Սուրենեան, Բրշ. Լեւոն Սրկ. Գույումճեան եւ դպիրներ։ Երգեցողութիւնները կատարուեցան հոգեւոր հայրերու եւ դպիրներու կողմէ, առաջնորդութեամբ՝ Գրիգոր Աւ. Քահանայի եւ երգեհոնահարութեամբ՝ Լուսի Գահվէճիեանի։

Նախ քան Տէրունական Աղօթքը, Պատրիարք Հայրը քարոզեց եւ անդրադարձաւ Ս. Սահակ Հայրապետի վարքին։ Յիշեցուց թէ, Քրիստոնէական արժէքներով սնած ու զարգացած մեծ հայրապետը, իր տեսլականը կեանքի կոչելու համար բաւականին աշխատած էր ու իր պաղատանքը մատուցած՝ առ Աստուած։ Այս տեսլականն էր, Քրիստոնէական հաւատքը լաւագոյնս փոխանցել Հայ ժողովուրդին։ Այս ուղղութեամբ, կարծէք Ս. Մեսրոպը կը յայտնուի, որպէս Աստուածային պատասխան եւ կը դառնայ Ս. Սահակի անմիջական գործակիցը։ Ուստի, Մեսրոպ Մաշտոց տքնաջան աշխատութեամբ կը նպաստէ մեծ առաքելութեան։ Թարգմանիչ վարդապետներու գլխաւոր մտագհոգութիւնը եղած էր հաւատքը հասկնալի դարձնել ժողովուրդին, որպէսզի զայն փոխանցելու դժուարութիւնը նուազանայ։ Ինչպէս զանազան առիթներով, այս Թարգմանչաց Տօնին եւս, սուրբերը կը փոխանցեն կարեւոր պատգամ մը եւ յատկապէս հայախօս հասարակութեան ուսերուն վրայ պարտականութիւն մը կը բերցնեն։ Ներկայիս պէտք է միջոցներ գտնենք, որպէսզի ոչ-հայախօս մեր զաւակներն ու բարեկամները եւս իմանան եկեղեցւոյ պատմութիւնը, ուսուցումն ու գրականութիւն։ Պատրիարք Հայրը, այս շրջագիծով շեշտեց եկեղեցւոյ մեծ դերը, որով մեր առջեւ կը բացուի հայերէնը սորվելու, զարգացնելու եւ իւրացնելու հսկայ դաշտ մը։ Իր խօսքերու աւարտին, Նորին Ամենապատուութիւնը յայտնեց, թէ՝ Հայերը վերջին շրջաններուն օտար մշակոյթներու նպաստելէ աւելի, գրաւուած են օտար աւանդութիւններէ, բան մը որ մեծ վտանգ կը սպառնայ մեր ժողովուրդին։

Ս. Պատարագի աւարտին պաշտօն կատարուեցաւ ի հանգիստ հոգւոցն Պատրիարքական Աթոռոյս Երանաշնորհ գահակալներ՝ Սահակ Արքեպս. Ապուչէխցիի, Մեսրոպ Արքեպս. Նարոյեանի, Գարեգին Արքեպս. Խաչատուրեանի եւ Մեսրոպ Արքեպս. Մութաֆեանի։ Յիշատակուեցան նաեւ վախճանեալ վարդապետներ, կրթական մշակներ, տեսուչներ, Հայ գրչի եւ մամլոյ սպասաւորները։

Արարողութեան աւարտին, Պատրիարք Հայրը, թափորով առաջնորդուեցաւ եկեղեցւոյ պարտէզը, ուր օրհնեց ներկաները։

Արարողութեան աւարտին, Պատրիարք Հօր նախագահութեամբ, եկեղեցւոյ պարտէզը համեստ ընդունելութիւն մը սարքուեցաւ ի պատիւ Ս. Թարգմանիչ Վարդապետներու։ Այս առիթով, Յարութիւն Աբեղայ ողջոյնի խօսք արտասանեց ու անդրադարձաւ օրուան խորհուրդին։ Այս առիթով, յանուն ներկաներուն շնորհաւորեց Պատրիարք Հօր անուան տօնախմբութիւնը, մաղթելով մեր Հոգեւոր Պետին արեւշատութիւն։ Մթնոլորտը ոգեւորուեցաւ միասնաբար երգուած տոհմիկ երգերով։

Հուսկ բանքը կատարեց Պատրիարք Հայրը եւ ուրախութիւնը յայտնեց տօնական արարողութեան կապակցութեամբ եւ յիշեցուց, թէ նման առիթները մէկտեղուելու, զրուցելու եւ գաղափարի փոխանակում ունենալու համար լաւ առիթներ են։ Առ այդ, ներկաներուն նկատառման յանձնեց, որ հայախօս տարրը չթողու իր սրբազան յամառութիւնը եւ կամքը դրսեւորէ հայախօս մթնոլորտներ վերահաստատելու համար։ Իր խօսքերու աւարտին Նորին Ամենապատուութիւնը օրհնեց ներկաները եւ մաղթեց համախմբուիլ զանազան առիթներով։

https://www.facebook.com/TRArmenianPatriarchate 

Leave a Reply

Your email address will not be published.