Դիւանագէտ դարձայ՝ ի հեճուկս հայկական կազմակերպութեան. Չաւուշօղլու

Թուրքիոյ արտաքին գործոց նախարար Մեւլութ Չաւուշօղլուն, որ վերջին շրջանին կը խօսի Հայաստանի հետ յարաբերութիւնները կարգաւորելու մասին, հերթական անգամ հանդէս եկած է հակահայկական յայտարարութեամբ: Այս մասին կը հաղորդէ Ermenihaber.am-ը՝ վկայակոչելով Haber7-ը։

Անթալիոյ դիւանագիտական համաժողովին ծիրէն ներս երիտասարդներու հետ հանդիպած Չաւուշօղլուն պատմած է, թէ ինչու եւ ինչպէս դարձած է դիւանագէտ։ Ըստ պատմածին՝ դիւանագէտի մասնագիտութիւնը ան ընտրած է՝ ի հեճուկս հայկական կազմակերպութեան, որ աշխարհի տարբեր վայրերու մէջ կ՝ոչնչացնէ թուրք դիւանագէտները։ Չաւուշօղլուն ակնյայտօրէն ակնարկած է ASALA-ի վրէժխնդրական գործողութիւններուն մասին, որոնք միտուած էին Հայոց Ցեղասպանութեան հարցի միջազգայնացման:

ASALA  –  ArmenianSecret Army for the Liberation of Armenia
ՀԱՀԳԲ – Հայաստանի Ազատագրութեան Հայ Գաղտնի Բանակ

«Երբ դպրոցական էի, հայկական ահաբեկչական կազմակերպութիւնը յարձակումներ կը գործէր մեր դիւանագէտներուն վրայ, զոհեր կու տայինք: Ես ալ, ի հեճուկս անոնց, որոշեցի դառնալ դիւանագէտ եւ սկսայ սորվիլ միջազգային յարաբերութիւններու բաժանմունքին մէջ»,- պատմած է Չաւուշօղլուն։

Ան, սակայն, ոչ մէկ բառ խօսած է ASALA-ի գործողութիւններու դրդապատճառներուն, Հայոց Ցեղասպանութեան հարցով Անգարայի ժխտողական քաղաքականութեան մասին։ Պարզապէս հերթական անգամ թուրք հասարակութեան ու յատկապէս երիտասարդութեան մէջ ատելութիւն սերմանած է հայերուն հանդէպ։

Yerakouyn.com 

Leave a Reply

Your email address will not be published.