Պատրիարք հայրը մասնակցեցաւ յայտնի բռնցքամարտիկ Կարպիս Զաքարեանին ձօնուած ցուցահանդէսին

Թուրքիոյ ազգային արհեստավարժ առաջին բռնցքամարտիկ Կարպիս Զաքարեանը յիշատակելու նպատակաւ, Պէյօղլուի քաղաքապետութեան նախաձեռնութեամբ «Ոսկեայ սրտով կռփամարտի ձեռնոց»  խորագրեալ ցուցահանդէսին բացումը կատարուեցաւ, 3 յունիս 2021, հինգշաբթի միջօրէին։ Բացման հանդիսութեան մասնակցեցան Պէյօղլուի գաւառապետ Մուսթաֆա Տէմիրէլլի, Պէյօղլուի քաղաքապետ Հայտար Ալի Եըլտըզ, Թուրքիոյ կռփամարտի դաշնակցութեան նախագահ Էյիւպ Կէօքչէք, Կարպիս Զաքարեանի տղան՝ Գասպար Զաքարեան, մարմնամարզական խումբերու վարչութիւններէ ներկայացուցիչներ եւ Պէյօղլուի շրջակայքի եկեղեցիներէ թաղային խորհուրդի անդամներ։ Սոյն հանդիսութիւնը պատուեց նաեւ Ն.Ա.Տ. Սահակ Բ. Պատրիարք հայրը, ընկերակցութեամբ գաւազանակիր Արժ. Տ. Շիրվան քհնյ. Միւրզեանի։

Ցուցահանդէսը, որ Կալաթասարայի լիսէի ներքեւ պատրաստուած էր, գեղեցկօրէն կը ներկայացնէր Կարպիս Զաքարեանի կեանքն ու գործունէութիւնը։ Բացօդեայ հանդիսութեան ուշադրութեամբ հետեւեցան բազմաթիւ պաշտօնական անձեր ու հետաքրքիր հասարակութիւնը։ Հանդիսավայրին մէջ պատրաստուած էր նաեւ բռնցքամարտի դաշտ մը։ Հանդիսութեան սկիզբը մեր Հոգեւոր պետը դիմաւորուեցաւ կազմակերպիչներու կողմէ, ապա պատանիներ բռնցքամարտիկի զգեստներ հագած հակիրճ ներկայացում մը կատարեցին։ Ապա տեղի ունեցան արտայայտութիւններ ու սրտի խօսքեր։ Հանդիսութեան կազմակերպիչը՝ Պէյօղլուի քաղաքապետը յայտնեց թէ՝ Զաքարեանը ցոյց տուած էր միասնաբար ու եղբայրաբար թէ՛ ուրախանալու եւ թէ յուզուելու կարելիութիւնը։ Այս ցուցահանդէսը առիթ եղած էր հանգուցեալ Զաքարեանը յիշատակուի իր կեանքի օրինակով։ Արարողութեան ընթացքին ընթերցուեցաւ նաեւ Երիտասարդութեան եւ մարմնամարզութեան նախարար Մէհմէտ Մուհարրէմ Քասափօղլուի պատգամը։ Բաց աստի արտայայտուեցան նաեւ Պէյօղլուի գաւառապետն ու Գասպար Զաքարեան։

Սրբազան Պատրիարք հայրը եւս հանդէս եկաւ իր սրտի խօսքով եւ յայտնեց թէ՝ երբ տարբեր ազգեր ու հաւաքականութիւններ, նոյն երկրի հովանիին ներքեւ կը համախմբուին, պարզուած տեսարանը կը դառնայ ոգեւորիչ։ Թուրքիոյ պարագային եւս ի զօրու էր այս մէկը։ Կարպիս Զաքարեանը, իր գործունէութեամբ, լաւագոյնս ցոյց տուած էր թէ՝ ինչպէս տարբեր հաւաքականութիւններ կրնային համախմբուիլ։ Ան, թէ՛ որպէս մարզիկ եւ թէ որպէս մարդ ունեցած էր բարեմասնութիւններ ու այս պատճառաւ անխտիր բոլորէն կը գնահատուէր, նոյնիսկ յետ մահու։ Պատրիարք Հայրը այս առիթով գոհունակութեամբ անդրադարձաւ հանգուցեալի վարքին։

Հանդիսութեան առիթով, Պէյօղլուի քաղաքապետին ձեռամբ «Garbis Zakaryan: Altın Kalpli Eldiven» գիրքէն օրինակ մը նուիրուեցաւ Պատրիարք հօր։ Յաջորդաբար, ներկաներ այցելեցին ցուցահանդէսը եւ հետաքրքրութեամբ տեսան Զաքարեանի նկարներն ու իրերը։ Հանդիսութիւնը իր աւարտին հասաւ, խմբանկարի նկարահանումով։

Պէտք է յիշեցնել, թէ ցուցահանէսը պիտի շարունակուի մինչեւ 10 հունիս, հինգշաբթի։ Փափաքողներ կրնան այցելել ցուցահանդէսը։

hyetert.org

Leave a Reply

Your email address will not be published. Required fields are marked *