Թուրքական ԴՆԹ նախագիծը մեղադրել է թուրք ժողովրդին «հրեշացնելու» մեջ

Ինտերնետային նախագիծը, որը կոչված է օգնելու թուրքերին ավելին իմանալ իրենց տոհմաբանության մասին, կոչ է արել բոյկոտել Ancestry.com ընկերությանը` թուրք ժողովրդին «հրեշացնելու» համար, գրում է Ahval-ը:

Թուրքական ԴՆԹ նախագիծը Twitter-ում արշավ է սկսել` կոչ անելով բոյկոտել Ancestry.com-ին` աշխարհի խոշորագույն կոմերցիոն տոհմաբանական ընկերությանը, այն բանից հետո, երբ կայքի արդյունքները ցույց են տվել, թե ինչպես են Անատոլիայի ոչ-թուրքական համայնքները ժամանակի ընթացքում ձուլվել այժմյան թուրքերին: «AncestryDNA-ն առաջնահերթ ուշադրություն է դարձնում թուրք ժողովրդի հրեշացման և Թուրքիայում նրա ներկայության ապալեգիտիմացման, այլ ոչ թե համապատասխան բնակչության գենետիկ կազմի վերաբերյալ տեղեկատվության տրամադրմանը»,- գրել են կոչի հեղինակները՝ վստահեցնելով, որ Ancestry.com-ը թուրքերին ներկայացնում է որպես «վատ տղաներ»:

Մասնավորապես, նրանք վրդովված են, որ կայքում խոսվում է Օսմանյան կայսրության ժամանակաշրջանում պոնտացի հույների, հայերի և բուլղարների, ներառյալ 19-րդ և 20-րդ դարերում այդ ժողովուրդների նկատմամբ կրոնական և էթնիկ հիմքով խտրականության փաստերի մասին։

Օրինակ՝ պոնտոսցի հույների դեպքում Ancestry.com-ը նշում է, որ նրանցից շատերը ստիպված էին թուրքերեն սովորել և իսլամ ընդունել՝ օսմանյան հասարակության մեջ իրենց հասանելի հնարավորություններն ընդլայնելու համար: Նշվում են պոնտացի հույների և բուլղարների դեմ բռնաճնշումները, որոնք մեղադրվում էին ամբողջ 19-րդ դարի Թուրքիայի դեմ պատերազմներում Ռուսաստանին աջակցելու մեջ:

Ancestry.com-ի նկարագրություններում նշվում է նաև 1922թ. Օսմանյան կայսրության անկումից հետո ոչ թուրքական համայնքներին առնչված տեղահանումը և էթնիկ զտումները: Մասնավորապես, 1915թ. Հայոց ցեղասպանությունը:

Թուրքիան իր ստեղծման օրվանից հավատարիմ է իր պատմության` պետության կողմից թելադրված ընկալմանը: Այդ պատճառով է, որ Թուրքիան կտրականապես դիմադրում է որոշակի պատմական իրադարձությունների ցանկացած ճանաչման, ինչպիսին է Հայոց ցեղասպանությունը, և քրեականացնում է դրա ճանաչումը: Թուրքիայի իշխանությունները լոբբիստական արշավներ են իրականացնում ընդդեմ այլ երկրների, այդ թվում՝ ԱՄՆ-ի, որոնք պաշտոնապես ճանաչել են Հայոց ցեղասպանությունը:

Սակայն 2021 թվականի ապրիլի 24-ին ԱՄՆ նախագահ Ջո Բայդենը պաշտոնապես ճանաչեց Հայոց ցեղասպանությունը:

Թուրք լրագրող Ուզայ Բուլութը իր Twitter-ում գրել է, որ Թուրքիայի պատմության բռնի և մոլեռանդ դրվագները ընդունելու դիմադրությունը ժամանակի ընթացքում միայն ավելի մեծ տառապանքներ է բերել ոչ թուրք փոքրամասնություններին: «Ինչո՞ւ են թուրք ազգայնականներն այդքան վախենում ճշմարտությունից: Որովհետև եթե նրանք բախվեն սրա հետ, իրենց հնարած սուտը հիմնովին կոչնչանա»,- գրել է նա՝ պատասխանելով թուրքական ԴՆԹ նախագծի հաղորդագրություններին: «Այս ստի պատճառով ատելությունն աճել է, ինչը նրանց ստիպել է այդքան շատ հանցագործություններ կատարել հույների, հայերի, ասորիների, հրեաների և այլ փոքրամասնությունների դեմ»:

https://news.am/arm/news/646417.html 

Leave a Reply

Your email address will not be published. Required fields are marked *