Դատարանին ե՞րբ պիտի յայտնէք Տինքի սպանութիւնը կազմակերպած «համակարգ»-ին մասին. Փայլանը՝ Սոյլուին

Թուրքիոյ ընդդիմադիր քրտամէտ Ժողովուրդներու դեմոկրատական կուսակցութեան (ԺԴԿ-HDP) հայ պատգամաւոր Կարօ Փայլանը անդրադարձած է Թուրքիոյ ներքին գործոց նախարար Սուլէյման Սոյլուի` թրքական «Haberturk» հեռուստաալիքին տուած հարցազրոյցին:

Ըստ Ermenihaber.am-ի՝ Սոյլուն համառօտ կերպով անդրադարձած էր Հրանդ Տինքի սպանութեան եւ դատավարութեան թեմային՝ զայն անուանելով Թուրքիոյ ամենակարեւոր հարցերէն մէկը:

Ան խօսած էր Տինքի սպանութեան գործով յանցագործներուն օգնելու մեղադրանքով դատապարտուած Էրհան Թունճելի եւ վերջերս աղմկայարոյց յայտարարութիւններով Թուրքիոյ ներքաղաքական կեանքը ցնցած քրէական հեղինակութիւն Սետաթ Փեքերի կապին մասին: Սոյլուն, մանրամասներ չյայտնելով, հռետորական հարցեր տուած էր, թէ ով գործընկեր դարձուցած է Թունճելին եւ Փեքերին, եւ թէ ով կամ ինչ համակարգ Թունճելին վստահած էր Փեքերին:

Փայլանը այդ գծով գրաւոր հարցապնդում ներկայացուցած է խորհրդարան՝ պահանջելով Թուրքիոյ ներքին գործոց նախարար Սուլէյման Սոյլուէն պատասխանել հետեւեալ հարցերուն.

1. Ինչո՞ւ դատարանին չէք յայտնած ձեր իմացած այն տեղեկութիւնները, որոնք վերաբերած են Տինքի սպանութեան հետ Սետաթ Փեքերի կապին:

2. Ո՞վ եւ ո՞ր համակարգն է Էրհան Թունճելին վստահած Սետաթ Փեքերին:

3. Դատական համակարգին ե՞րբ պիտի յայտնէք այն, ինչ գիտէք Տինքի սպանութիւնը կազմակերպած «համակարգ»-ին մասին։

Յիշեցնենք, որ Թուրքիոյ յայտնի յանցաւոր հեղինակութիւններէն մէկը՝ Սետաթ Փեքերը, որ կը թաքնուի արտասահմանի մէջ վերջին երեք շաբթուան ընթացքին ցնցած է Թուրքիան YouTube-ի մէջ տեղադրուած շարք մը տեսանիւթերով: Ան մեղադրանքներ կ՝առաջադրէ յայտնի թուրք պետական ​​նախկին ու ներկայ գործիչներու դէմ, ներառեալ` սպանութեան, բռնաբարութեան, կաշառակերութեան եւ թմրանիւթերու վաճառքի մէջ:

Yerakouyn.com 

Leave a Reply

Your email address will not be published. Required fields are marked *