Թուրքիայում կրոնափոխ հայերը 1945 թվականին էլ են պետության կողմից շարունակել «վտանգավոր» համարվել

«Ակօս» պոլսահայկական շաբաթաթերթում հրապարակված նոր փաստաթուղթը վկայում է, որ 1945 թ Օրդուում կրոնափոխ եղած հայերը պիտակավորվել են պետության կողմից, և նրանց վերաբերյալ ասվել է «Երկրի համար նրանցից շահ ակնկալելն անիմաստ է»։

Այդ մասին, Akunq.net-ի փոխանցմամբ, գրում է թուրքական «Դուվար» պարբերականը։

Աղբյուրի համաձայն՝ Թուրքիայի վարչապետարանին կից Հանրապետական արխիվում կատարված ուսումնասիրության արդյունքում մի փաստաթուղթ է հայտնաբերվել, որում առկա են Օրդուում և շրջակա բնակավայրերում ապրող հայերի գրանցումները։ Թուրք ուսումնասիրող Մահսունի Գյուլի կողմից «Ակօս» շաբաթաթերթում հրապարակված սույն վավերագիրը պարունակում է Օրդուի հայերի 3 էջանոց և իսլամացված հայերի 2 էջանոց ցանկեր, ըստ որոնց՝ 1945 թ․ Օրդուում և մերձակայքում ընդհանուր 114 հայ է ապրել։

Փաստաթղթի երկրորդ էջի ներքևի հատվածում մասնավորապես նշված է․ «Վերոհիշյալ կրոնափոխ հայերը, լինելով Առաջին համաշխարհային պատերազմի ժամանակ տեղահանության ենթարկված հայերի զավակները, լքվել են կամ առավելագույնը վերցվել վրացի գաղթականների հովանու տակ և մեծացվել նրանց կողմից։ Այն փաստը, որ այս հայերի մեծ մասը անկեղծորեն չի ընդունել իսլամը, ակնհայտ է դառնում նրանց՝ հայկական համայնքի հետ շփումներից ու կապերից։ Երկրի համար նրանցից շահ ակնկալելն անիմաստ է»։

Փաստաթղթում նաև ընդգծվում է, թե այս հայերն «անվստահելի անձինք են»։ Վավերագրի 3-րդ էջում ներկայացված է այժմ Օրդուում բնակվող հայերի ցանկը։ «Ակօս» շաբաթաթերթի ապրիլի 9-ի համարում հրապարակված սույն փաստաթուղթը կրում է BCA 490-1-0–0_50-199-4 կոդը։ «Ակօս»-ը նախընտրել է ներկայում Օրդուում ապրող հայերի անունները թաքցնել և հարցի վերաբերյալ արել է հետևյալ դիտարկումը․

«Մենք գիտակցաբար ենք հայերի անունները ծածկած ներկայացնում։ Դա արել ենք այդ անհատների իրավունքների հանդեպ հարգանքից ելնելով։ Քանզի գիտակցում ենք, որ որոշակի դեպքերում որոշ ընտանիքներ, իրենց բնակության վայրից և շրջապատից ելնելով, կնախընտրեն, որ այդ տեղեկությունները գաղտնի մնան»։

https://www.gazeteduvar.com.tr/yeni-belge-din-degistiren-ermeniler-zararli-gorulmekten-kurtulamamis-haber-1519739

Թարգմանեց Մելինե Անումյանը

Akunq.net

Leave a Reply

Your email address will not be published. Required fields are marked *