«Մենք կողմ ենք Թուրքիայի և Ռուսաստանի միջև աճող լարվածության խաղաղ կարգավորմանը». Թուրքիայի պաշտպանության նախարար

Թուրքիայի պաշտպանության նախարար Հուլուսի Աքարը հայտարարել է, որ իրենք կողմ են Ռուսաստանի և Ուկրաինայի միջև աճող լարվածության խաղաղ կարգավորմանը, հայտնում է Ahval-ը։

«Ինչպես միշտ ենք ասել, կողմ ենք Ռուսաստանի և Ուկրաինայի միջև լարվածության խաղաղ կարգավորմանը՝ հարգելով միջազգային իրավունքի շրջանակում տարածքային ամբողջականությունը», – բարձրաստիճան զինվորականների հետ առցանց խորհրդաժողովի ընթացքում ասել է Թուրքիայի պաշտպանության նախարարը։

Աքարն ընդգծել է, որ Ուկրաինան Թուրքիայի ռազմավարական դաշնակիցն է համարվում, և որ իրենք «ամեն ձևով  կաջակցեն խաղաղ ճանապարհով, երկխոսության ապահովման միջոցով հարցի լուծմանը»:

Թուրքիայի պաշտպանության նախարարը ևս մեկ անգամ խոսել է Ռեջեփ Թայիփ Էրդողանի և Ուկրաինայի նախագահ Վլադիմիր  Զելենսկիի միջև կայացած հանդիպման մասին և նշել, որ այդ ընթացքում խոսվել է Ուկրաինայի անվտանգության, տարածքային ամբողջականության և խաղաղության մասին, ինչպես նաև թուրքական կողմը նշել է, որ սերտորեն հետևում է Ղրիմի թաթարների ապագային տարածաշրջանում։

Ինչպես ավելի վաղ տեղեկացրել էր Tert.am-ը, Ռուսաստանը վերջին շրջանում ուժեղացրել է հսկողությունը երկրի արևմտյան սահմանին և ավելացրել զորքի քանակը։ Ռուսաստանը հսկիչ ստուգման ընթացքում երկրի արևմտյան սահմաններ է տեղափոխել երկու բանակ և օդադեսանտային զորքերի (ՕԴԶ) երեք միավորում: Այս մասին հայտնել էր ՌԴ պաշտպանության նախարար Սերգեյ Շոյգուն՝ նշելով, որ զորքերն ուղարկվել են «ուսումնամարտական առաջադրանքների կատարման շրջաններ»:

Ուկրաինան և արևմտյան դաշնակիցները, այդ թվում՝ Միացյալ Նահանգները, Ռուսաստանից պահանջում են հետ քաշել զորքերը։

Երեքշաբթի Բրյուսելում կայացած ՆԱՏՕ-ի գագաթնաժողովում դաշինքի գլխավոր քարտուղար Ենս Ստոլտենբերգը վերահաստատել է դաշինքի աջակցությունը Ուկրաինային և Ռուսաստանի զորքերի տեղաշարժն անվանել «չարդարացված, անհասկանալի և խորապես մտահոգիչ»: Ի պատասխան Սերգեյ Շոյգուն նշել է, որ զորավարժությունները կշարունակվեն ևս երկու շաբաթ, և որ զորքերի կուտակումը իր արևմտյան սահմանների ուղղությամբ ՆԱՏՕ-ի հնարավոր սպառնալիքի պատասխանն է:

Հիշեցնենք, որ Էրդողանը ևս մեկ անգամ հաստատել է Թուրքիայի կողմից «Ղրիմի բռնակցումը չընդունելու» մասին։

https://www.tert.am/am/news/2021/04/14/tr-donbas/3582592 

Leave a Reply

Your email address will not be published. Required fields are marked *