Թուրքիան Արցախի պատերազմին ընթացքին Պաքուին օգնելու համար նաեւ մանկահասակ վարձկաններ ուղարկած է Ազրպէյճան

Թուրքիոյ աջակցութիւնը վայելող սուրիական խմբաւորումները մանկահասակ մարտիկներ կը զինուորագրեն եւ կ՛ուղարկեն Լիպիա եւ Ազրպէյճան` Թուրքիոյ դաշնակից ուժերուն կողքին կռուելու համար: Այս մասին հաղորդեց թրքական «Ահվալ»-ը` յղում կատարելով քրտամէտ «Մեզոփոթամիա» լրատու գործակալութեան:

Գործակալութիւնը տուեալներ ստացած է Ֆաժր Մաալիքի անունով սուրիացի նախկին վարձկանէ մը: Յայտնի է, որ ան 13 տարեկան եղած է, երբ անդամագրուած է Թուրքիոյ հովանաւորութեան տակ գտնուող Սուրիական ազատ բանակին, որ այժմ կը կոչուի Սուրիական ազգային բանակ:

«Որովհետեւ Թուրքիան սկսած էր Սուրիական ազատ բանակին մէջ աւելի շատ տղամարդիկ հաւաքագրել Աֆրինի գործողութեան համար, ան նաեւ սկսած էր աւելի շատ երեխաներ զինուորագրել, եւ ատիկա կը շարունակուի մինչեւ այսօր: Այժմ Սուրիական ազգային բանակի խմբաւորումներուն մէջ այնքան շատ երեխայ կայ», ըսած է Մաալիքի:

Գործակալութիւնը կ՛աւելցնէ, որ Սուրիացիներ յանուն ճշմարտութեան եւ արդարութեան իրաւապաշտպան կազմակերպութեան մարտ 2020 թուականին հրապարակած զեկուցումին մէջ կայ պնդում, թէ Թուրքիան զինուորագրած է մանկահասակ զինուորներ` զանոնք Լիպիա ուղարկելու համար:

«Պէտք է յստակ ըլլայ, որ երբ Թուրքիան Սուրիական ազգային բանակի խմբաւորումներ ուղարկեց Ազրպէյճան (ազրպէյճանական ուժերուն աջակցելու` Լեռնային Ղարաբաղի վրայ սեպտեմբեր 2020-ին կատարուած յարձակումին), անոնց մէջ նոյնպէս երեխաներ կային: Սուրիական ազգային բանակի անդամները պարզապէս վարձկաններ են Թուրքիոյ համար: Թուրքիոյ նախագահ Ռեճեփ Թայիփ Էրտողան մեզ ուղարկած է Լիպիա, Ազրպէյճան: Երիտասարդ սերունդը, անոնք, որոնք պատերազմի սկսելու ժամանակ տակաւին երեխաներ էին, անգրագէտ են, անկիրթ եւ միամիտ: Կը կարծեմ` անոնք պիտի մնան Թուրքիոյ ստրուկը», ըսած է Մաալիքի:

https://www.aztagdaily.com/archives/504817 

Leave a Reply

Your email address will not be published. Required fields are marked *