Թուրքիայի նախկին նախագահ Աբդուլա Գյուլը քննադատել է քրդամետ Ժողովուրդների դեմոկրատական կուսակցության գործունեությունն արգելափակելու գործընթացն ու Օմեր Ֆարուք Գերգերլիօղլուին պատգամավորական մանդատից զրկելու մասին որոշումը, հայտնում է Ahval թերթը։

Դատախազները դիմել են Թուրքիայի Սահմանադրական դատարան` Ժողովուրդների դեմոկրատական կուսակցության գործունեությունն արգելափակելու համար` վկայակոչելով կուսակցության ենթադրյալ կապերն ապօրինի գործող Քրդական բանվորական կուսակցության հետ: Թուրքիայի կառավարությունը ասում է, որ Ժողովուրդների դեմոկրատական կուսակցությունն աջակցում է Քրդական բանվորական կուսակցությանը, որն ինքնավարություն փնտրող զինված խմբավորում է և ԱՄՆ-ի և Եվրամիության կողմից համարվում է ահաբեկչական:

«Ես կարծում եմ, որ դա շատ սխալ է։ Այդ քայլը բեռ է լինելու Թուրքիայի կառավարության վրա, որը վերջերս խոստացել է քաղաքացիական բարեփոխումներ իրականացնել», – ասել է Գյուլը։

Նա նշել է, որ նախկին փորձը ցույց է տվել, որ կուսակցությունների գործունեության արգելափակումն ու անձեռնմխելիության վերացումը խթանում են ահաբեկչական կազմակերպությունների գործունեությանը և հավելել, որ ահաբեկչությանը մարտահրավեր կարելի է նետել միայն ժողովրդավարության ամրապնդմամբ և մարդու իրավունքների վերականգնմամբ։

https://www.tert.am/am/news/2021/03/19/Gul/3557248