Թուրքիայի նախագահ Ռեջեփ Թայիփ Էրդողանի կառավարությունը կորոնավիրուսի համավարակն օգտագործում է ավտորիտար իշխանությունն ուժեղացնելու համար, ասված է Human Rights Watch միջազգային կազմակերպության նոր զեկույցում, որի համաձայն՝ կառավարությունը լռեցնում է քննադատներին և ընդունում նոր օրենքներ, որոնք ուղղված են այլախոհության սահմանափակմանը։

Համավարակի պատրվակով թուրքական իշխանությունները 2020 թ. արգելել են ընդդիմության և կառավարության քննադատների ցույցերի անցկացումը, ինչպես նաև` ընդունել նոր օրենքներ, որոնք ուղղված են սոցիալական ցանցերի նկատմամբ Անկարայի վերահսկողության խստացմանը, ասված է ամենամյա զեկույցում, որտեղ քննարկվում է ավելի քան 100 երկրներում մարդու իրավունքների պաշտպանության պրակտիկան:

«Ահաբեկչության մեղադրանքները շարունակում են լայնորեն օգտագործվել՝ պետական հեղաշրջման փորձից հետո չորս տարիների ընթացքում կարծիքների ազատ արտահայտման իրավունքները սահմանափակելու համար»,- ասված Է զեկույցում, որտեղ մատնանշվում է ահաբեկչության հետ կապերի համար Թուրքիայում մի շարք հայտնի անձանց ձերբակալությունները, որոնց թվում են թուրք գործարար Օսման Քավալան, քուրդ քաղաքական գործիչ Սելահաթին Դեմիրթաշը և գրող ու լրագրող Ահմեդ Ալթանը։

Զեկույցում նաև խոսվում է վերջին չորս տարվա ընթացքում բանտերում կտտանքների, դաժան վերաբերմունքի և անմարդկային կամ արժանապատվությունը նվաստացնող վերաբերմունքի վերաբերյալ պնդումների թվի աճի մասին:

«Դատախազները նման մեղադրանքներով բովանդակային հետաքննություն չեն իրականացնում, ըստ այդմ անպատժելիության մթնոլորտ է ստեղծվել անվտանգության ուժերի աշխատակիցների և դրան մասնակից պետական պաշտոնյաների համար»,- ասված Է հայտարարության մեջ:

https://www.tert.am/am/news/2021/01/14/Report/3494853