Դիարբեքիրի հայերն արդեն 5 տարի է, ինչ չեն կարողանում Սուրբ Ծնունդը հայկական եկեղեցում տոնել․ քրդական լրատվակայքի անդրադարձը

Դիարբեքիրում ապրող հայերը 2015 թ մինչ օրս չեն կարողանում Սուրբ Ծնունդը հայկական Սուրբ Կիրակոս եկեղեցում նշել, քանի որ Սուրի շրջանում տեղի ունեցած թուրք-քրդական բախումների հետևանքով վնասված այս եկեղեցու վերանորոգումն առայժմ չի ավարտվել։

Այդ մասին, ըստ Akunq.net-ի, հաղորդում է քրդական «Ռուդավ» թուրքալեզու լրատվակայքը։

Աղբյուրի փոխանցմամբ՝ Թուրքիայի Շրջակա միջավայրի և քաղաքաշինության նախարարությունը և Հիմնադրամների շրջանային տնօրինությունը մեկ ու կես տարի առաջ սկսել են Սուրբ Կիրակոս եկեղեցու վերականգնումը, որը սակայն կավարտվի միայն 2022 թվականին։

Քրդական կայքէջը նաև հայտնում է, որ պատմական և ճարտարապետական արժանիքների շնորհիվ այս շրջանի ամենանշանավոր եկեղեցիներից մեկը համարվող Սուրբ Կիրակոս հայկական եկեղեցու վերանորոգումն ավարտվել էր 2011 թվականին՝ Դիարբեքիրի քաղաքապետ Օսման Բայդեմիրի հրահանգով, և որ այդ նույն տարում համայն աշխարհի հայության մասնակցությամբ հանդիսավոր կերպով իրականացվել էր եկեղեցու վերաբացումը։

Սակայն 2015 թ․ սկսված ընդհարումների պատճառով եկեղեցին մեծ վնաս էր կրել, իսկ Սուրի շրջանում փողոց դուրս գալու արգելք էր սահմանվել։ Ներկայում սույն շրջանի 6 թաղամասերում փողոց դուրս գալու արգելքը դեռ չի վերացվել, իսկ Դիարբեքիրի հայերն արդեն 5 տարի է՝ չեն կարողանում այնտեղ որևէ կրոնական արարողություն կազմակերպել։

Դիարբեքիրի Սուրբ Կիրակոս եկեղեցու հիմնադրամի ղեկավար Օհաննես Օհանյանը (թուրք․ անունը՝ Գաֆուր Թյուրքայ) «Ռուդավ»-ի թղթակցի հետ զրույցում հայտնել է, որ տեղի հայերն իրենց նորածին զավակներին կնքելու համար ստիպված են լինում Ստամբուլ կամ Հաթայ հասնել։

Օհաննես Օհանյանը նաև նշել է․ «Մեր եկեղեցին շատ հին է ու պատմական։ 2011 թ․ վերականգնվելուց հետո մեծ հանդիսությամբ իրականացրեցինք եկեղեցու բացումը, որը կատարվեց մեծ խանդավառությամբ, և Ամերիկայից և այլ բազմաթիվ երկրներից 4 հազար հոգի մասնակցեցին այդ արարողությանը։ Սակայն 2015 թ․ Սուրում մեծ ընդհարում եղավ, որից տուժեց նաև մեր եկեղեցին։ Դժբախտաբար, նաև փողոց դուրս գալու արգելք սահմանվեց։ Ներկայում սովորական քաղաքացիների մուտքն արգելված է այդ վայրեր»։

Պարոն Օհանյանը նաև շեշտելով, որ եկեղեցին վերանորոգվում է Թուրքիայի Շրջակա միջավայրի և քաղաքաշինության նախարարության ու Հիմնադրամների շրջանային տնօրինության կողմից, իր երախտագիտությունը հայտնեց եկեղեցու վերականգնմանը մասնակից բոլոր հաստատություններին և տեղեկացրեց, որ նորոգումը կավարտվի 2022 թվականին։

Օհաննես Օհանյանը նաև հավելեց․ «Հինգ տարի է, ինչ չենք կարողանում տոները նշել։ Ցավոք, մեր հիշարժան օրերը, միջոցառումներն ու տոները ռեստորաններում ու սրճարաններում ենք նշում։ Այս տարի համավարակի պատճառով Սուրբ Ծնունդը ոչ մի սրճարանում չենք տոնելու, որի համար նեղսրտած եմ։ Մեզ վշտացում է, որ 5 տարի շարունակ հեռու ենք մնացել մեր եկեղեցուց։ Հուսով եմ՝ առաջիկա տարում Սուրբ Ծնունդը կնշենք Սուրբ Կիրակոս եկեղեցում և վերստին մեր նախկին գեղեցիկ օրերին կվերադառնանք»։

Դիարբեքիրի Սուրբ Կիրակոս եկեղեցու հիմնադրամի ղեկավարը զրույցի վերջում շնորհավորել է բոլորի Սուրբ Ծնունդը և համայն մարդկությանը խաղաղություն, եղբայրություն ու ազատություն մաղթել։

https://www.rudaw.net/turkish/kurdistan/2212202011

Թարգմանեց Մելինե Անումյանը

Akunq.net

Leave a Reply

Your email address will not be published. Required fields are marked *