ԵՄ գագաթնաժողովի նախաշեմին և պատժամիջոցների սպառնալիքի ֆոնին Թուրքիան ԵՄ երկրների հետ հաշտության փորձեր է ձեռնարկում․ Bloomberg

Դեկտեմբերին կայանալիք ԵՄ գագաթնաժողովի նախաշեմին, որի ընթացքում պետք է նաև քննարկվի Թուրքիայի դեմ պատժամիջոցներ սահմանելու հարցը, Թուրքիան հաշտության փորձեր է ձեռնարկում Եվրամիության երկրների հետ, փորձում լուծել նրանց հուզող հարցերը, գրում է Bloomberg գործակալությունը:

Ինչպես նշում է գործակալությունը, Եվրամիության գագաթնաժողովից երկու շաբաթ առաջ թուրքական Oruç Reis սեյսմահետախուզական նավը Արևելյան միջերկրածովյան ջրերից նավահանգիստ է վերադարձել է։ Թուրքիան նույնիսկ դեսպանորդ է ուղարկել Բրյուսել՝ Հունաստանի հետ երկխոսություններ սկսելու համար։

Թուրքական կառավարությունը նաև քայլեր է ձեռնարկել ԵՄ առաջնորդների՝ Թուրքիայում կրոնական անհանդուրժողականության վերաբերյալ մտահոգության ուղղությամբ։

Նշվում է, որ կիրակի այդ երկրի նախագահ Ռեջեփ Թայիփ Էրդողանի մամուլի քարտուղար Իբրահիմ Քալինը և արդարադատության նախարար Աբդուլհամիթ Գյուլը հանդիպել են ոչ մահմեդական փոքրամասնությունների կրոնական առաջնորդների և կազմակերպության ղեկավարների հետ և հավաստիացրել, որ կառավարությունը կաշխատի իրենց եկեղեցիներին, դպրոցներին և գույքին վերաբերող հարցերի լուծման ուղղությամբ։

«Կրոնական փոքրամասնությունները մեր երկրի հարստությունն են»,- ավելի ուշ Twitter -ի իր էջում գրել է Քալընը ՝ հավելելով, որ նրանց նկատմամբ խտրականությունը կթուլացնի Թուրքիան:

Թուրքիայի նախագահ Ռեջեփ Թայիփ Էրդողանի՝ Հյուսիսային Կիպրոս կատարած այցի և Միջերկրական ծովի արևելյան մասում թուրքական գործողությունների պատճառով անցյալ շաբաթ ԵԽ-ն կոչ էր արել պատժամիջոցներ կիրառել Անկարայի դեմ։

Դեկտեմբերի 11-12-ին կայանալիք գագաթնաժողովին ԵՄ առաջնորդները կքննարկեն Թուրքիայի դեմ պատժամիջոցների հարցը։

https://www.tert.am/am/news/2020/12/01/Bloomberg/3458006 

Leave a Reply

Your email address will not be published. Required fields are marked *