Փարիզի քաղաքային խորհուրդը Արցախի Հանրապետութեան ճանաչման վերաբերեալ բանաձեւ ընդունած է

Փարիզի քաղաքային խորհուրդը որդեգրած է բանաձեւ Արցախի Հանրապետութեան ճանաչման վերաբերեալ: Այս մասին կը հաղորդէ Ֆրանսայի մէջ Հայաստանի դեսպանատունը:

«Փարիզի քաղաքապետարանի գործադիր մարմինի «Միասնական Փարիզ», «Համայնավար եւ քաղաքացի», «Փարիզի բնապահպաններ», «Սերունդներ», «Անկախներ եւ յառաջդիմականներ», «Փոխել Փարիզը», «Մոտեմ», «Ժողովրդավարներ եւ բնապահպաններ» խմբակցութիւններուն առաջարկով Փարիզի քաղաքային խորհուրդը կոչ կ՛ուղղէ.

– Որ Փարիզի քաղաքապետը նամակով դիմէ Եւրոպայի եւ արտաքին գործոց նախարարին` կոչ ուղղելով Ֆրանսային ճանչնալու Արցախի Հանրապետութիւնը (Լեռնային Ղարաբաղ),

– Որ Ֆրանսայի կառավարութիւնը, ջնջելով Ֆրանսայի տեղական ինքնակառավարման մարմիններու առջեւ դրուած Լեռնային Ղարաբաղի հետ յարաբերութիւններ հաստատելու արգելքը, մարդասիրական օգնութեան ծիրին մէջ անոնց արտօնէ համագործակցիլ Լեռնային Ղարաբաղի հետ,

– Որ Փարիզի քաղաքային իշխանութիւնները տեղական գործիչներու միջոցով կարենան շտապ մարդասիրական օգնութիւն տրամադրել Լեռնային Ղարաբաղին` ըստ կարելւոյն հասցէագրուած օգնութիւն յատկացնելով տագնապէն վնասուած բնակչութեան,

– Որ Փարիզի քաղաքային իշխանութիւնները 50.000 եւրոյի չափով ելեւմտական օժանդակութիւն ցուցաբերեն Լեռնային Ղարաբաղի բնակչութեան եւ տեղահանուածներուն, որոնք ապաստան գտած են Հայաստանի Հանրապետութեան մէջ: Այս օգնութիւնը, որ կը տրամադրուի Ֆրանսայի համահայկական հիմնադրամին միջոցով, կը գումարուի Ֆրանսախօս քաղաքապետներու միջազգային ընկերակցութեան միջոցով Փարիզի գործընկեր եւ Ֆրանսախօս քաղաքապետներու միջազգային ընկերակցութեան անդամ մայրաքաղաք Երեւանին նախապէս տրամադրուած 50.000 եւրոյի օժանդակութեան», նշուած է յայտարարութեան մէջ:

http://www.aztagdaily.com/archives/490112 

 

Leave a Reply

Your email address will not be published. Required fields are marked *