Զգուշանալով Թուրքիայի դերից` Ֆրանսիան ցանկանում է միջազգային վերահսկողություն սահմանել Լեռնային Ղարաբաղում հրադադարի ռեժիմի պահպանման նկատմամբ. Reuters

Ֆրանսիան ցանկանում է, որ Լեռնային Ղարաբաղում հրադադարի ռեժիմի պահպանման նկատմամբ միջազգային վերահսկողություն սահմանվի, քանի որ Փարիզում զգուշանում են Ռուսաստանի և Թուրքիայի միջև հետագայում արևմտյան պետություններին խաղից դուրս հանելու վերաբերյալ գործարքի կնքման հնարավորությունից: Այս մասին գրում է Reuters գործակալությունը:

Հրադադարից հետո Ռուսաստանը բանակցություններ է վարել Թուրքիայի` Ադրբեջանի գլխավոր դաշնակցի և Մինսկի խմբի քննադատի հետ. այդ բանակցությունները կարող են հանգեցնել Անկարայի կողմից զորքերի ներդրմանը տարածաշրջանում:

«Մարտական գործողությունների ավարտը պետք է թույլ տա բարեխիղճ բանակցությունների վերսկսում, վերջին շաբաթներին իրենց տները լքած Լեռնային Ղարաբաղի բնակիչների վերադարձ` լավ պայմաններով»,-հայտարարել է Ֆրանսիայի նախագահ Էմանուել Մակրոնի գրասենյակը` Հայաստանի և Ադրբեջանի ղեկավարների հետ նախագահի հեռախոսազրույցներից հետո:

Ֆրանսիայում բնակվում է 400 000-ից մինչև 600 000 ծագումով հայ: Մակրոնը զգուշություն է ցուցաբերել հակամարտության կողմին աջակցելու հարցում, և իր երկրում քննադատվել է Երևանին բավականաչափ չօգնելու համար:

«Մենք ցանկանում ենք, որ Մինսկի խումբն իր դերը խաղա հսկողություն սահմանելու հարցում (հրադադարի ռեժիմի նկատմամբ)», – լրագրողների հետ զրույցում ասել է Ֆրանսիայի նախագահի խոսնակը:

Աղբյուրը հայտնում է, որ Փարիզը պնդում է «միջազգային վերահսկողություն» սահմանել հրադադարի ռեժիմի նկատմամբ, որպեսզի թույլ տրվի փախստականների վերադարձը, Ղարաբաղից օտարերկրյա զինյալների, հատկապես Սիրիայից եկածների հետդարձը, և բանակցություններ սկսել Լեռնային Ղարաբաղի կարգավիճակի շուրջ:

Վերջին մի քանի ամիսներին Ֆրանսիայի և Թուրքիայի հարաբերությունները կտրուկ վատթարացել են: Փարիզը Անկարային մեղադրում է Կովկասում ճգնաժամ ստեղծելու համար:

«Մենք հասկանում ենք, որ ռուսները թուրքերի հետ խոսում են հնարավոր բանաձևի շուրջ, որը մենք չենք ցանկանում, որը կկրկնի Աստանան (Աստանայի գործընթացը) ՝ այս զգայուն տարածաշրջանում իրենց դերերը բաժանելու համար: Մենք չենք կարող մի կողմում ունենալ Մինսկ, մյուս կողմում` Աստանա: Ռուսները ի վերջո պետք է ընտրություն կատարեն»-ասել է պաշտոնյան:

Աստանայի գործընթացը թույլ էր տվել Ռուսաստանին և Թուրքիային կարգավորել սիրիական հակամարտությունը` շրջանցելով արևմտյան տերություններին:

Հիշեցնենք, որ նոյեմբերի 9-ին Ռուսաստանի, Հայաստանի և Ադրբեջանի ղեկավարները Լեռնային Ղարաբաղում ռուս խաղաղապահների տեղակայման շուրջ պայմանավորվածություն են ձեռք բերել, ստորագրվել է հայտարարություն, որով Ադրբեջանին են անցնում Արցախի յոթ շրջանները, Շուշին ու Հադրութը` բացառությամբ մի գյուղի, գյուղեր Ասկերանի ու Մարտունու շրջանից, ինչպես նաև Մարտակերտի շրջանի Թալիշ և Մատաղիս գյուղերը։

Ըստ այդ հայտարարության՝ Լեռնային Ղարաբաղում շփման գծի երկայնքով և Լաչինի միջանցքի երկայնքով տեղակայվում է Ռուսաստանի Դաշնության խաղաղապահ զորախումբ, այդ թվում՝ հրաձգային զենքով զինված 1960 զինծառայող, 90 զրահամեքենա, 380 միավոր ավտոմոբիլային և հատուկ տեխնիկա: ՌԴ խաղաղապահների մի մասին արդեն տեղակայվել է Արցախում։

https://www.tert.am/am/news/2020/11/20/Kharabakh-France/3447756 

Leave a Reply

Your email address will not be published. Required fields are marked *