Մոսկուա յորդորած է UNESCO-ն մասնակցիլ Արցախի մէջ մշակութային արժէքներու պահպանման

Կ՛ակնկալենք, որ ՄԱԿ-ը միանայ Լեռնային Ղարաբաղի մէջ կատարուող աշխատանքներուն. Լաւրով

ՄՈՍԿՈՒԱ, «ՌԻԱ Նովըսթի»․- Արցախի մէջ մշակութային արժէքները պահպանելու համար կրնան ներգրաւուիլ մասնագէտներ` UNESCO-ի Համաշխարհային ժառանգութեան կեդրոնին առաջարկով, ըսաւ Ռուսիոյ արտաքին գործոց նախարարութեան յատուկ առաքելութիւններու դեսպան Էլիոնորա Միթրոֆանովա:

Ռուսիոյ արտաքին գործոց նախարար Սերկէյ Լաւրով նախապէս յայտարարած էր, որ ԵԱՀԿի Մինսկի խմբակի համանախագահները, համագործակցելով ՄԱԿի կազմակերպութիւններու եւ յատկապէս UNESCO-ի հետ՝ կրնան հսկայական դեր ունենալ Արցախի մէջ խաղաղ կեանք հաստատելու, ցեղային-դաւանանքային խումբերու համակեցութեան, մշակութային, կրօնական վայրերու վերակենդանացման եւ անոնց անվտանգ եւ յարգալից գործունէութիւնը ապահովելու գործին մէջ:

Լաւրով նաեւ կարեւոր նկատեց ՄԱԿի գաղթականներու հարցերու գերագոյն յանձնակատարի գրասենեակին եւ մարդասիրական հարցերու համակարգման գրասենեակին ներդրումները։

«Լեռնային Ղարաբաղի մէջ առճակատման դադրեցման անփոխարինելի պայմանը տեղւոյն քրիստոնէական սրբավայրերու անձեռնմխելիութիւնն է», իր կարգին յայտնեց Ռուս ուղղափառ եկեղեցւոյ Մոսկուայի պատրիարքարանը:

Նշենք, որ ատրպէյճանցիները արդէն իսկ պղծած են Շուշիի Ս. Ամենափրկիչ Ղազանչեցոց Մայր տաճարը:

Asbarez.com 

Leave a Reply

Your email address will not be published. Required fields are marked *