Կոստանդնուպոլսի Խորայի Սուրբ Փրկիչ բյուզանդական եկեղեցին (Kariye Kilisesi), որը պատմամշակութային առումով նույնքան արժեքավոր է, որքան Սուրբ Սոֆիա տաճարը, 2 օրից կվերաբացվի մզկիթի կարգավիճակով։ Հոկտեմբերի 30-ին այստեղ կկատարվի առաջին ուրբաթօրյա աղոթքը։ Այդ նպատակով Թուրքիայի Կրոնական գործերի վարչությունը ծածկել է տվել վանքի հոյակերտ որմնանկարները։

Այդ մասին, Akunq.net-ի փոխանցմամբ, հաղորդում է ռուսական «Սպուտնիկ»-ի թուրքական ծառայության կայքէջը։

Ըստ աղբյուրի՝ Ստամբուլի Ֆաթիհ շրջանում գտնվող այս պատմական վանքում, որ տարիներ շարունակ գործում էր որպես թանգարան, փակվել են բոլոր քրիստոնեական խորհրդանշանները և սրբապատկերները, որի հետևանքով այն կորցրել է իր ամբողջ հմայքը։

Իրենց հիասթափությունը չեն կարողացել զսպել անգամ որոշ թուրք պաշտոնյաներ։ Այսպես, Ստամբուլի քաղաքապետարանի գլխավոր քարտուղարի տեղակալ Մահիր Փոլաթն իր թվիթերյան էջում գրել է․ «Համաշխարհային արվեստի պատմության գլուխգործոցներից Քարիյեի որմնանկաները և հախճապակիները ծածկելը, ցավոք, վերացրել է այս կառույցի դիմագիծը և մշակութային արժեքը։ Ձախում նախկին տեսքն է, իսկ աջում՝ ներկայիս։ Նախագիծը պատկանում է Թուրքիայի մշակութային ժառանգությունը ղեկավարող և պահպանող նախարարություններին և հաստատություններին»։

​https://tr.sputniknews.com/turkiye/202010281043105140-diyanete-devredilen-ve-camiye-cevrilen-kariyede-freskler-beyaz-perdeyle-kapatilmis/

Թարգմանեց Մելինե Անումյանը

Akunq.net