Քոնկրեսի գրադարանը սրբագրեց Հայոց Ցեղասպանութիւնը «Հայկական ջարդեր» կոչելու սխալը

ՈՒԱՇԻՆԿԹԸՆ.- Ամերիկայի Հայ Դատի յանձնախումբին նախաձեռնած եւ մեծ թիւով քոնկրեսականներու աջակցութիւնը ապահոված արշաւին շնորհիւ, Քոնկրեսի գրադարանի ղեկավարութիւնը վերջապէս որոշեց սրգաբրել Հայոց Ցեղասպանութիւնը «Հայկական ջարդեր» կոչելու իր սխալը:

Ամերիկայի Հայ Դատի յանձնախումբի գործադիր վարիչ Արամ Համբարեան ողջունեց ուշացած այս քայլը՝ շեշտելով, որ Թուրքիոյ ճնշումներուն տեղի տուող նման քայլերը աւելի յանդուգն դարձուցած են Անգարան, որ այս օրերուն կը փոռձէ 2րդ անգամ ըլլալով ցեղասպանութեան ենթարկել հայութիւնը։

Ինչպէս նախապէս հաղորդած էինք, Միացեալ Նահանգներու Քոնկրեսի գրադարանը, պատասխանելով Ամերիկայի Հայ Դատի յանձնախումբի նամակին՝ Յուլիսին տեղեկացուցած էր, թէ պիտի շարունակէ Հայոց Ցեղասպանութիւն եզրը չգործածել՝ պնդելով, որ այս հարցին մէջ կը հետեւի Միացեալ Նահանգներու նախագահին եւ արտաքին գործոց նախարարութեան օրինակին, հակառակ անոր որ, ինչպէս կառոյցին անունը կը թելադրէ, գրադարանը Քոնկրեսին հովանիին տակ կը գտնուի:

Առնուազն 50 քոնկրեսականներ իրենց ձայնը միացուցած էին Նեւատա նահանգէն դեմոկրատ քոնկրեսական Տինա Թայթըսին, որ իր նամակին մէջ գրած էր, թէ Քոնկրեսի գրադարանի ղեկավարութեան կողմէ գործածուող «Հայկական ջարդեր» եզրը ժամանակավրէպ դարձած է յատկապէս, երբ Քոնկրեսը ճանչցած է Հայոց Ցեղասպանութիւնը:

Հայ Դատի արշաւին կենսական աջակցութիւն ցուցաբերեցին նաեւ քոնկրեսականներ Էտըմ Շիֆ, Կաս Պիլիրաքիս, Ֆրենք Փալոն, Ճեքի Սփիր եւ Պապ Մենենտեզ, ինչպէս նաեւ Քալիֆորնիոյ համալսարանի Լոս Անճելըսի մասնաճիւղի գրադարանը։

Աշխարհահռչակ աստղ Քիմ Քարտաշեան ողջունեց այս քայլը, զայն «տարեդարձիս լաւագոյն նուէրը» համարելով:

Asbarez.com 

 

Leave a Reply

Your email address will not be published. Required fields are marked *