Սեպտեմբերի 16-ին թուրքական դատարանում տեղի է ունեցել պոլսահայ լրագրող, «Ակօս» թերթի նախկին գլխավոր խմբագիր Հրանտ Դինքի սպանության գործով հերթական լսումը: Այս մասին տեղեկացնում է «Ակօս» պարբերականը:

Նիստին որպես վկա լսվել է սպանության օրը հերթապահած, Թուրքիայի ազգային հետախուզական ծառայության Ստամբուլի մասնաճյուղի գլխավոր տնօրեն Ահմեթ Քյոքյոյը, որի վկայությունների հիման վրա կհստակեցվեն գործի որոշ մանրամասներ:

Դինքի ընտանիքի փաստաբանները պահանջում են ընդլայնել գործը` լսելով 2004 թվականին Դինքի հետ հանդիպած Ազգային հետախուզական ծառայության աշխատակիցներին:

Ենթադրվում էր, որ Դինքին սպանած ազգայնական Օգյուն Սամասթը ազատ է արձակվելու սեպտեմբերին, սակայն նրա ազատազրկման ժամկետը ավելացել է ևս 4 տարով` բանտի աշխատակիցների վրա հարձակվելու պատճառով:

Հիշեցնենք, որ Հրանտ Դինքը սպանվել է 2007թ. հունվարի 19-ին` Ստամբուլի Շիշլի թաղամասում գտնվող «Ակօս» թերթի խմբագրատան առջև` 16-ամյա թուրք ազգայնական Օգյուն Սամասթի կրակոցից: Հրանտ Դինքի սպանության վերաբերյալ դատավարությունը ձգվում է ավելի քան 10 տարի և դեռևս չի գտել իր հանգուցալուծումը:

https://mamul.am/am/news/188867