Թուրք պաշտոնյաների հերթական հերյուրանքը․ Աղթամարի Սուրբ խաչ եկեղեցին կրում է նաև թուրքական ճարտարապետության հետքեր

Թուրքիայի Վաքըֆների ընդհանուր տնօրեն Բուրհան Էրսոյը հայտարարել է, որ Վաքըֆների ընդհանուր տնօրինությունը 12 եկեղեցի է վերականգնել։ Այդ մասին, ըստ Akunq.net-ի, հայտնում է «Հաբերթյուրք» պարբերականը։

Աղբյուրի համաձայն՝ սեպտեմբերի 6-ին Վանա լճի Աղթամար կղզու Սուրբ Խաչ եկեղեցում մատուցված պատարագին ներկա է գտնվել նաև Վաքըֆների ընդհանուր տնօրեն Բուրհան Էրսոյը, ով «Անադոլու» լրատվական գործակալության թղթակցի հետ զրույցում հիշեցրել է, թե Սուրբ Խաչը սկսել է վերանորոգվել 2005 թվականին։

Թուրք պաշտոնյան, խեղաթյուրելով պատմական փաստերը, նաև ասել է, թե Սուրբ Խաչն իբրև թե կրում է ոչ միայն հայկական, այլ նաև բյուզանդական, սասանյան, աբբասյան և թուրք մահմեդական ճարտարապետության հետքերը։

Էրսոյը նաև շեշտել է թուրքական պետութան «բարեհաճությունը քրիստոնյա փոքրամասնությունների նկատմամբ»՝ մասնավորապես նշելով․

«Կարևոր է, որ այս եկեղեցու վերանորոգումն ավարտվել է, և որ տարեկան մեկ անգամ պատարագ է մատուցվում այստեղ։ Պետությունն էլ դա թույլ է տալիս։ Մենք էլ, որպես գերատեսչություն, աջակցություն ենք ցուցաբերում։ Վաքըֆների ընդհանուր տնօրինությունը 12 եկեղեցի է վերականգնել։ Մենք նրբանկատություն ենք ցուցաբերում եկեղեցիների վերանորոգման և կրոնական հավատքների հանդեպ։

Ինչպես հայտնի է, Վաքըֆների ընդհանուր տնօրինությունը 161 հիմնադրամ է ղեկավարում։ Այդ համայնքային վաքըֆների վերահսկողությունը մենք ենք իրականացնում։ Հիմնադրամների կողմից գրանցված սինագոգները, եկեղեցիները և հրեական աղոթատեղիները բաց են հավատացյալների առջև։ Մենք, որպես Թուրքիայի Հանրապետության պետության ներկայացուցիչներ, ցուցաբերում ենք անհրաժեշտ նրբանկատությունը։ Կրոնական ազատությունը կարևոր է մեզ համար»։

Թուրք պաշտոնյան վերջում հայտնել է, թե տարեկան 270 հազար մարդ է այցելում Աղթամարի Սուրբ խաչ եկեղեցին։

Հիշեցնենք, որ Աղթամարի Սուրբ խաչ եկեղեցին վերանորոգվելուց հետո «բարեհաճ» Թուրքիայի պետական մարմինների կողմից վերածվել է թանգարանի։ Իրականում Թուրքիայի իշխանություններն հազվադեպ են վերականգնում փոքրամասնությունների աղոթավայրերը, իսկ եկեղեցիների մեծ մասն էլ վերանորոգվելուց հետո վերածվում է թանգարանի կամ մշակութային կենտրոնի և օգտագործում միայն զբոսաշրջությունը զարգացնելու նպատակով։

https://www.haberturk.com/vakiflar-genel-muduru-burhan-ersoy-12-kiliseyi-restore-ettik-2795715

Թարգմանեց Մելինե Անումյանը

Akunq.net

 

Leave a Reply

Your email address will not be published. Required fields are marked *