Jerusalem Post. Թուրքիայի կողմից ագրեսիայի տարածաշրջանային գործողությունները սպառնալիք են Իսրայելի համար

Թուրքիայի կողմից ագրեսիայի տարածաշրջանային գործողությունները սպառնալիք են ներկայացնում Իսրայելի համար եւ նպաստում են Մերձավոր Արեւելքի եւ Արեւելյան Միջերկրածովի երկրների միջեւ սերտ հարաբերությունների զարգացմանը, Jerusalem Post-ում հրապարակված հոդվածում գրում է Սեթ Ջ․ Ֆրանցմանը:

Արդարություն եւ զարգացում կուսակցությունը (ԱԶԿ) «առաջիկա տարիներին հրեական պետության համար շատ ավելի մեծ մարտահրավեր կդառնա:

Ֆրանցմանը կարծում է, որ Թուրքիայի եւ Իսրայելի միջեւ հաշտության հույսերը անհիմն են, քանի որ Անկարան շարունակում է «փաղաքշել» ՀԱՄԱՍ-ին:

Շաբաթ օրը Էրդողանը Ստամբուլում ընդունել է ՀԱՄԱՍ-ի առաջնորդների մեծ պատվիրակությանը, այդ թվում՝ քաղաքական բյուրոյի ղեկավար Իսմայիլ Հանիային:

Անկարան «ամեն ամիս նոր ճգնաժամ է պարտադրում» տարածաշրջանին, կարծում է հեղինակը։

Վերջին ամիսներին թուրքական բանակը եւ դրան հավատարիմ գրոհայինները մեծ հարձակում են սկսել Սիրիայում եւ Իրաքում քրդական զինված խմբավորումների դեմ, միջամտել են Լիբիայի գեներալ Խալիֆա Հաֆթարի դեմ պայքարին, աջակցել են Ադրբեջանին՝ ընդդեմ Հայաստանի եւ վիճելի ջրերում դիմակայել են Հունաստանի ռազմածովային ուժերին:

Թուրքիան նաեւ պահանջներ է ներկայացրել արեւելյան Միջերկրական ծովում գտնվող գազի եւ նավթի օֆշորային պաշարների վերաբերյալ, ինչը առաջացրել է Իսրայելի, Հունաստանի, Կիպրոսի եւ այլ երկրների զայրույթը, որոնք համագործակցում են Կիպրոսի ափամերձ հատվածում խոշոր գազատարի նախագծի շուրջ:

Թուրքիայի տարածաշրջանային մրցակիցներ Եգիպտոսը եւ Արաբական Միացյալ Էմիրությունները՝ արաբական այն քիչ երկրներից երկուսը, որոնք ճանաչում են Իսրայելի ինքնիշխանությունը, Անկարայի կողմից հովանավորվող «Մահմեդական եղբայրներ»-ին դիտարկում են որպես ահաբեկչական կազմակերպություն:

Իսրայելի հետախուզության ղեկավար Յոսի Կոհենը «տարիներ շարունակ Պարսից ծոցի ընկերների հետ գաղտնի քննարկում էր Իրանը, բայց այժմ նա կարծում է, որ Իսրայելի խնդիրները ավելի շատ առնչվում են Թուրքիային»,- ասել է Ֆրանցմանը՝ վկայակոչելով օգոստոսի 18-ի Times-ի հրապարակումը:

Ըստ Ֆրանցմանի՝ աճում է փոխհամաձայնությունը այն բանի շուրջ, որ «Թուրքիայի ագրեսիվ գործողությունները եւ մարտահրավերները նպաստում են ԱՄԷ-ի, Իսրայելի, Եգիպտոսի, Կիպրոսի եւ Հունաստանի միջեւ առավել սերտ հարաբերությունների հաստատմանը»:

https://news.am/arm/news/598492.html 

Leave a Reply

Your email address will not be published. Required fields are marked *