Business Insider-ը Սպիտակ տան մամուլի քարտուղարի՝ «Հայոց ցեղասպանություն» եզրույթի կիրառումից հետո դիմել է Պետդեպին և Սպիտակ տանը պարզելու՝ արդյոք ԱՄՆ-ն կճանաչի Ցեղասպանությունը

Ամերիկյան հեղինակավոր Business Insider լրատվական կայքը Սպիտակ տան մամուլի քարտուղար Քեյլի ՄաքԷնանիի՝ հուլիսի 6-ին կայացած մամուլի ասուլիսի ժամանակ «Հայոց ցեղասպանություն» եզրույթի հրապարակային կիրառումից հետո դիմել է ԱՄՆ պետդեպարտամենտին և Սպիտակ տանը՝ պարզելու համար արդյոք մամուլի քարտուղարի կողմից «ցեղասպանություն» եզրույթի կիրառումը նշանակում է, որ ԱՄՆ-ն պաշտոնապես կճանաչի Հայոց ցեղասպանությունը։

Անդրադառնալով նախօրեին Սպիտակ տան մամուլի քարտուղարի կողմից ԱՄՆ-ում Հայոց Ցեղասպանության հուշարձանի մասին խոսելիս «ցեղասպանություն»  եզրույթի կիրառմանը՝ հոդվածագիր Ջոն Հոլթիվանգերը նկատում է, որ ՄաքԷնանիի այդ քայլը հակասում է ԱՄՆ կառավարության պաշտոնական դիրքորոշմանը և կարող է նախագահ Դոնալդ Թրամփին անհարմար դրության մեջ դնել թուրքական կառավարության առաջ։

Պարբերականի ներկայացուցիչները դիմել են ԱՄՆ պետդեպարտամենտին՝ պարզելու համար արդյոք մամուլի քարտուղարի կողմից «ցեղասպանություն» եզրույթի կիրառումը նշանակում է, որ ԱՄՆ-ն կճանաչի Հայոց ցեղասպանությունը, ինչին ի պատասխան Պետդեպարտամենտի ներկայացուցիչը Insider-ին հորդորել է մեկնաբանություն ստանալու համար դիմել Սպիտակ տանը։

Ինչպես հետևում է հոդվածից, Սպիտակ տունը դեռևս չի պատասխանել Insider-ի հարցմանը։

Ամերիկյան պարբերականը նաև մեջբերել է Ամերիկայի Հայ դատի հանձնախմբի հայտարարությունն առ այն, որ ՄաքԷնանիի մեկնաբանությունները կարող են ազդարարել ԱՄՆ-ում «Հայոց ցեղասպանության համապետական ճանաչման» առաջին քայլերը:

Ավելի վաղ The Washington Post-ն անդրադառնալով Սպիտակ տան մամուլի քարտուղար Քեյլի ՄաքԷնանիի՝ հուլիսի 6-ին կայացած մամուլի ասուլիսի ժամանակ «Հայոց ցեղասպանություն» եզրույթի հրապարակային կիրառմանը՝ գրել էր, որ «մամուլի քարտուղարի շուրթերից հնչած եզրույթը կարևոր է այն առումով, որ ԱՄՆ կառավարությունը տասնամյակներ շարունակ հրաժարվում է ճանաչել 20-րդ դարի սկզբին տեղի ունեցած դեպքերը» :

Tert.am

Leave a Reply

Your email address will not be published. Required fields are marked *