Թուրք լուսանկարիչը բոլորին հին հայկական մայրաքաղաք Անի է հրավիրում

Անին ապշեցնում է ոչ միայն իր պատմական նշանակությամբ, այլև գեղեցիկ բնությամբ։

Թուրքիայի խոշորագույն «Անադոլու» լրատվական գործակալությունը հոդված է հրապարակել հնագույն հայկական մայրաքաղաք Անիի մասին, որն այսօր գտնվում է իր տարածքում (պատմական Արևմտյան Հայաստան)։

«Անի քաղաքը, որն անվանում են «աշխարհի քաղաք» և «քաղաքակրթության օրրան», ներառվել է 2016 թվականի ՅՈւՆԵՍԿՕ–ի համաշխարհային ժառանգության ցանկում։ Քաղաքը գտնվում է հայ–թուրքական սահմանին և հանդիսանում Թուրքիայի պատմական կենտրոններից մեկը», – գրված է հոդվածում։

Նշվում է նաև, որ Անին հարուստ պատմություն ունի, այն «23 քաղաքակրթությունների կենտրոնն» է, այստեղ է եղել հայկական Ուրարտու պետությունը, քաղաքը ղեկավարում էին Արշակունիների, Բագրատունիների և Կամսարականների դինաստիաները, Սասանյաններն ու Սելևկյանները։ Անին Բագրատունիների դինաստիայի մայրաքաղաքն է եղել 884-1045 թվականներին։ Թուրքերը քաղաքը գրավեցին 1065 թվականին։ Դրանից հետո մուսուլմաններն ու քրիստոնյաները միասին էին բնակվում քաղաքում, գրում է պարբերականը։

Անին դատարկվեց 1319 թվականի երկրաշարժից հետո։ Անիի հայերը քաղաքից դուրս գյուղեր ստեղծեցին, սակայն դրանք էլ ամայացան 1915 թվականի Հայոց ցեղասպանությունից հետո։

«Անադոլու» գործակալությունը հարցազրույց է անցկացրել թուրք լուսանկարիչ Օզգեն Բեշլիի հետ, որը լուսանկարել է Անին։ Նա պատմել է, որ քաղաքը և՛ հարուստ պատմություն ունի, և՛ գեղեցիկ բնություն։

«Անիի ջրվեժներն աննկարագրելի են։ Քաղաքի ավերակներից շուրջ 4.5 կմ անցնելով` կարելի է երկու գեղեցկագույն ջրվեժ տեսնել։ Դրանք շքեղ են և՛ ձմռանը, և՛ ամռանը», – պատմում է Բեշլին։

Լուսանկարիչը խոստովանում է, որ քաղաքն իր տեսքով հանգստացնում է իրեն։ Նա կոչ է անում բոլորին այցելել Անի և սքանչելի լուսանկարներ անել։

Անին հիշատակվում է հայ պատմիչների կողմից V դարից սկսած։ Նրանք Անին նկարագրել են որպես «բլրի վրա գտնվող Կամսարականների անառիկ ամրոց»։ Քաղաքն իր անվանումը ստացել է Անի–Կամախ ամրոցի և հեթանոսական սրբատեղիի անունից, որը գտնվում էր Կարինի Դարանաղի գավառում։ Անին որոշ ժամանակ հայտնի էր նաև Խնամք անունով։

Armeniasputnik.am 

Leave a Reply

Your email address will not be published. Required fields are marked *