«Ազդակ»-ի առցանց լսարան. Կարէն Վերանեան. «Թուրքիոյ եւ Ազրպէյճանի շահերը միշտ չէ, որ կը համատեղուին, սակայն չեն խախտեր ռազմավարական գործընկերութիւնը»

«Թուրքիան` միջազգային եւ տարածաշրջանային զարգացումներուն մէջ» նիւթին մասին «Ազդակ»-ի 6-րդ առցանց լսարանին զեկուցեց արեւելագէտ, քաղաքական վերլուծաբան Կարէն Վերանեան: Լսարանը վարեց «Ազդակ»-ի ելեկտրոնային բաժնի աշխատակից Մինաս Հանս Քէհեան:

Ան համապարփակ զեկուցում տուաւ Թուրքիոյ արտաքին քաղաքականութեան, այդ քաղաքականութեան կիրարկելիութեան համար ռազմական ներկայութիւն դառնալու նկրտումներուն, Անգարա-Պաքու, Անգարա-Թէլ Աւիւ եւ Անգարա-արաբական աշխարհ յարաբերութիւններուն, մրցակցութիւններուն եւ շահերու բախման կէտերուն մասին:

Քննարկումը առիթ եղաւ խօսելու թրքական սփիւռքի այսօրուան դերակատարութեան, ինչպէս նաեւ Իսրայէլի եւ Իրանի նկատմամբ Անգարայի եւ Պաքուի որդեգրած տարբեր կապերուն մասին, որոնք յամենայնդէպս չեն խախտեր թրքացեղ երկու պետութիւններու դաշինքային գործընկերական յարաբերութիւնները:

Աթէնք-Երեւան-Նիկոսիա բնական դաշնակցային յարաբերութիւնները կարեւոր նկատելով` Կարէն Վերանեան խօսեցաւ նաեւ տեղեկատուական հոսքին մասին` Յունաստանի եւ Հայաստանի ուղղութեամբ թրքական յարձակումներ պատրաստելու արկածախնդրութեան գծով: Ան յայտնեց, թէ նման ծրագիրներ նոր չեն, եւ թէ ռազմական նման արկածախնդրական քայլ առնելու հաւանականութիւնը բարձր չէ` նկատի ունենալով հայկական կողմի կարգ մը հանգամանքներ, որոնք անպայման կապուած չեն Թուրքիոյ եւ Հայաստանի ռազմական կարողականութիւններուն կամ բացառապէս ռուսական սահմանապահութեան հետ:

Դասախօսութեան եւ անոր հետեւած քննարկումին արձանագրութիւնը տեղադրուած է «Ազդակ»-ի կայքին վրայ:

http://www.aztagdaily.com/archives/476019 

 

Leave a Reply

Your email address will not be published. Required fields are marked *