Քոնկրեսի գրադարանը կը շարունակէ Ցեղասպանութիւնը ուրանալ

Պատասխանելով Ամերիկայի Հայ Դատի յանձնախումբին կողմէ անցեալ Դեկտեմբերին յղուած նամակին, Միացեալ Նահանգներու Քոնկրեսի գրադարանը տեղեկացուց, թէ պիտի շարունակէ Հայոց Ցեղասպանութեան անդրադառնալ՝ իբրեւ «Հայկական ջարդեր», հակառակ այն իրողութեան, որ Քոնկրեսի երկու ճիւղերը՝ Ներկայացուցիչներու տունը եւ Ծերակոյտը, անցեալ տարի յստակօրէն ճանչցան Հայոց Ցեղասպանութիւնը՝ հաստատելով յաջորդաբար թիւ 296 եւ 150 բանաձեւերը։

Ամերիկայի Հայ Դատի յանձնախումբի գործադիր վարիչ Արամ Համբարեան քննադատեց այս քայլը, որուն իբրեւ «արդարացում» Քոնկրեսի գրադարանը իր 19 Յունիս թուակիր նամակին մէջ գրած էր, թէ այս հարցին մէջ կը հետեւի Միացեալ Նահանգներու նախագահին եւ արտաքին գործոց նախարարութեան օրինակին, հակառակ անոր որ, ինչպէս կառոյցին անունը կը թելադրէ, գրադարանը Քոնկրեսին հովանիին տակ կը գտնուի եւ ըստ սահմանադրութեան, երկրին գործադիր եւ օրէնսդիր մարմինները համահաւասար գործակիցներ են։

Նամակին ամբողջութիւնը կարելի է կարդալ http://asbarez.com/194822 կայքէջին վրայ։

Yerakouyn.com 

Leave a Reply

Your email address will not be published. Required fields are marked *