Թուրքիայի 1-ին պրոֆեսիոնալ բռնցքամարտիկ Կարպիս Զաքարյանի անունով մրցաշար կանվանակոչվի

2020թ. հունվարի 25-ին Ստամբուլում 90 տարեկան հասակում մահկանացուն կնքած Թուրքիայի 1-ին պրոֆեսիոնալ բռնցքամարտիկ, «Երկաթե բռունցք» մականունով հայտնի Կարպիս Զաքարյանի անունով բռնցքամարտի մրցաշար կանվանակոչվի։ 

Այս մասին հայտնել է Թուրքիայի խորհրդարանի հայ պատգամավոր Կարո Փայլանը՝ հիշեցնելով, որ Զաքարյանի մահից հետո ինքն այս թեմայով գրավոր հարցադիմում էր հղել Թուրքիայի երիտասարդության և սպորտի նախարար Մեհմեթ Մուհարրեմ Քասափօղլուին։

Փայլանը հետաքրքրվել էր թուրք նախարարից, թե արդյոք պատրաստվում է մի այնպիսի նախագիծ, որը կհանրահռչակի Զաքարյանի ներդրումը թուրքական սպորտում ու կապրեցնի նրա անունը։ Փայլանը հուշել էր նաև, որ Զաքարյանի անունով կարելի է կոչել որևէ մարզահամալիր։

Քասափօղլուն պատասխանել է Փայլանի հարցադիմումին՝ տեղեկացնելով, որ արդեն հստակեցվել է Զաքարյանի անունով մրցաշարի անվանակոչության հարցը, ինչպես նաև քննարկման փուլում է գտնվում որևէ սպորտային համալիր նրա անունով կոչելու հարցը։

Հայ պատգամավորն ուրախալի է համարել Զաքարյանի անունով Թուրքիայում մրցաշար անվանակոչելը՝ հիշեցնելով սակայն, որ հայ անվանի մարզիկը կարիերայի ընթացքում երբեմն խտրականությունների է ենթարկվել (ազգային պատկանելության պատճառով-խմբ․)։

Ermenihaber.am 

Leave a Reply

Your email address will not be published. Required fields are marked *