ANCA-ն մեկ տասնյակից ավելի ամերիկյան կազմակերպությունների հետ կանխել է առաջատար լրատվամիջոցներում Ցեղասպանության հերքման նյութերի հրապարակումը

ԱՄՆ Հայ դատի հանձնախմբի գրասենյակը (Արևելյան և Արևմտյան շրջանները ներառյալ), համագործակցելով ցեղասպանությունների ճանաչման, կանխման համար պայքարող, ինչպես նաև փաստաբանական և իրավապաշտպան կազմակերպությունների հետ, իրականացրել է հաջողված արշավ, որի շրջանակում ավելի քան 120 առաջատար լրատվամիջոցների (ԱՄՆ բոլոր 50 նահանգներում) կոչ է արվել զրոյական հանդուրժողականության քաղաքականություն վարել առհասարակ մարդկայնության դեմ զանգվածային բնաջնջումների ու հանցագործությունների և մասնավորապես Հայոց ցեղասպանության պատմական փաստի հերքման դեմ:

Ինչպես հայտնում է Asbarez-ը, արշավի մասնակիցները նամակներով դիմել են լրատվամիջոցներին՝ դրանց խմբագրակազմերին կոչ անելով Ցեղասպանության հերքման քարոզի հարթակ չդարձնել իրենց հրապարակումները:

Աղբյուրը մանրամասնում է, որ արշավն իրականացվել է 2016 թվականից սկսած և հանրության շրջանում ոչ միայն բարձրացրել է Հայոց ցեղասպանության վերաբերյալ իրազեկվածության մակարդակը, այլև բարեհաջող կանխել է մեդիադաշտում տվյալ պատմական փաստի հերքման վերաբերյալ նոր նյութերի հրապարակումը:

ANCA-ի Արևմտյան շրջանի գրասենյակի նախագահ Նորա Հովսեփյանն իր երախտագիտությունն է հայտնել ստեղծված կոալիցիայի բոլոր գործընկերներին՝ Ցեղասպանության հերքման դեմ կանգնելու համար:

Աղբյուրը հավելում է, որ այս տարվա համար նոր կոալիցիա է ստեղծվել, և այն ներառում է 19 կազմակերպություն, այդ թվում նաև՝ հունական, կիպրական և հրեական:

https://www.tert.am/am/news/2019/05/02/genocide-denial/2988477?fbclid=IwAR2XQbxnSCKOTRk98Dr-nOp1yxll5-k2lXGtt1g1UCUbf_57fujnRtyoQmM 

Leave a Reply

Your email address will not be published. Required fields are marked *