Ինչո՞ւ հրեական լոբբին չաջակցեց Ցեղասպանության բանաձևին

Հայկական լոբբին շատ ճիշտ ժամանակ էր ընտրել Հայոց ցեղասպանության վերաբերյալ թիվ 252 բանաձևը ԱՄՆ Կոնգրեսի Ներկայացուցիչների պալատի լիագումար նիստի օրակարգում ներառելու համար։ Այս մասին է գրում CNNTurk-ի գլխավոր խմբագիր, հայտնի թուրք վերլուծաբան Մեհմեդ Ալի Բիրանդը։

Նշենք, որ թուրք վերլուծաբանն այս հոդվածը, որը լույս է տեսել այսօր, գրել է երեկ, երբ դեռ վերջնականապես պարզ չէր Ցեղասպանության բանաձևի ճակատագիրը։

«Շաբաթվա սկզբից Անկարան անհանգիստ էր։ Հայկական լոբբին, չսպասելով մինչև ապրիլ, վերջին պահին Թուրքիայի դարպասը ցանկանում էր գնդակ ուղարկել։ ԱՄՆ Կոնգրեսում տեղի ունենալիք փոփոխությունների ընթացքում ցանկանում էր անցկացնել Ցեղասպանության բանաձևը։ Այս հոդվածը գրելու պահին դեռևս հայտնի չէ բանաձևի ճակատագիրը»,– գրում է Մեհմեդ Ալի Բիրանդը՝ ընդգծելով, որ այդ ողջ ընթացքում հետաքրքիր էր հրեական լոբբիի կեցվածքը։

«Հայկական բանաձևն իսկական տեստ է թուրք–ամերիկյան հարաբերությունների, ինչպես նաև Միացյալ Նահանգներում գործող հզոր հրեական լոբբիի՝ թեմայի առնչությամբ ունեցած դիրքորոշման տեսանկյունից… Հայերն իրենց ընձեռված հնարավորությունն օգտագործելու համար շատ ճիշտ ժամանակ էին ընտրել։ Ներկայացուցիչների պալատում նրանց հզոր կողմնակիցները պարտվել էին ընտրություններում և հեռանում էին։ Իսկ Նենսի Փելոսին այն անձանցից մեկն էր, ում ամենից շատն էին վստահում հայերը։ Պալատի վերջին աշխատանքային օրերի ընթացքում նա կարող էր անցկացնել բանաձևը։ Բացի այդ, Վաշինգտոնում ծայրաստիճան բացասաբար էին տրամադրված Թուրքիայի հանդեպ։ Թուրքիայի վրա բարկացած էր նաև հրեական լոբբին, ով միշտ աջակցում էր Անկարային»,– գրում է Բիրանդը՝ ավելացնելով.

«Իսկ թե ինչպիսի ավարտ կունենա հայերի նախաձեռնությունը, կիմանանք այսօր։ Սակայն մեկ բան հստակ է՝ հրեական լոբբին որևէ կերպ չփորձեց հանդես գալ Թուրքիայի դեմ։ Հրեական լոբբիստական ամենահզոր կազմակերպություններից AIPAC-ը («ԱՄՆ-Իսրայել հասարակական հարաբերությունների կոմիտե»), հակառակ հայկական կողմի կոչերին, չխախտեց լռությունը։ Սակայն եթե ցանկանար, շատ բան կարող էր անել, բայց չարեցին»,– գրում է թուրք վերլուծաբանը՝ մեջբերելով հրեական լոբբի կողմից նման գործելաոճի հնարավոր պատճառների մասին ամերիկացի փորձագետներից մեկի դիտարկումները.

«Հրեական լոբբին չի ցանկանում, որ վերջնականապես խզվեն թուրք–իսրայելական հարաբերությունները։ Նրանք գիտակցում են, որ եթե Իսրայելը կորցնի Թուրքիան, դրանով մեծ վնաս կհասցվի իրենց պետությանը։ Այդ պատճառով էլ ուշադիր են գործում։ Հրեական լոբբին հավատացած է, որ «Ազատության տորմիղի» հետ տեղի ունեցած միջադեպի հետևանքով առաջացած ճգնաժամը որոշ ժամանակ անց հնարավոր կլինի հաղթահարել»։

Tert.am

16:29 • 23.12.10

Leave a Reply

Your email address will not be published.