Էրդողանի կուսակցությունը հաղթել է ՏԻՄ ընտրություններում, սակայն պարտվել թուրքական խոշոր քաղաքներում

Մարտի 31-ին Թուրքիայում կայացած տեղական ինքնակառավարման մարմինների (ՏԻՄ) ընտրություններում նախագահ Ռեջեփ Թայիփ Էրդողանի «Արդարություն և զարգացում» կուսակցությունը թեև հաղթանակ է տարել, սակայն պարտվել է մայրաքաղաք Անկարայում, ինչպես նաև երկրի խոշորագույն քաղաքում՝ Ստամբուլում:

Համապատասխան տվյալները հրապարակել է Բարձրագույն ընտրական հանձնաժողովը:

Ինչպես նշում է korrespondent.net կայքը, Անկարայում հաղթել է ընդդիմադիր Ժողովրդահանրապետական կուսակցության թեկնածու Մանսուր Յավաշը՝ հավաքելով ձայների 50%-ից ավելին: Մինչդեռ Էրդողանի կուսակցության թեկնածու, գործող քաղաքապետ Մեհմեթ Օզհասեքին հավաքել է ձայների 47,06%-ը: Այսպիսով՝ ավարտվել է Էրդողանի կուսակցության՝ մայրաքաղաքի նկատմամբ 25 տարվա իշխանության ժամանակահատվածը:

Ինչ վերաբերում է Ստամբուլին, ապա այստեղ իրենց հաղթանակի մասին են հայտարարել ինչպես «Արդարություն և զարգացում» կուսակցության, այնպես էլ ընդդիմության ներկայացուցիչները: Մասնավորապես՝ քաղաքապետի պաշտոնում առաջադրված Բինալի Յըլդըրըմը, որը նախկինում զբաղեցնում էր վարչապետի պաշտոնը, հայտարարել է մրցակցից մոտ 28 000 ձայնով առաջ անցնելու մասին: Մինչդեռ Ժողովրդահանրապետական կուսակցության տվյալներով՝ իր թեկնածու Էքրեմ Իմամօղլուի օգտին քվեարկել է 4000-ով ավելի մարդ, քան Յըլդըրըմի օգտին:

Նշվում է, որ գրեթե բոլոր քվեաթերթիկների մշակման արդյունքում պարզվել է, որ Յըլդըրըմը ստացել է ձայների 48,7%-ը, իսկ նրա մրցակիցը՝ 48,65%-ը:

Ընդհանուր առմամբ, ՏԻՄ ընտրություններում հաղթել են «Արդարություն և զարգացում» կուսակցության թեկածուները:

Ինչպես ավելի վաղ հայտնել էր tert.am-ը, նախագահ Ռեջեփ Թայիփ Էրդողանը հայտարարել էր, որ մարտի 31-ի ընտրությունները «Թուրքիայի գոյության համար կարևոր ընտրություններ են»:

Միևնույն ժամանակ կանխատեսվել էր, որ նրա «Արդարություն և զարգացում» կուսակցությունը կարող է պարտվել մայրաքաղաք Անկարայում, Ստամբուլում: Այդ էին վկայում հարցումների արդյունքները:

Թուրքերի դժգոհության պատճառը տնտեսական վիճակն է, ազգային արժույթի՝ լիրայի արժեզրկումը, ուստի՝ որոշ ընտրողներ հայտնել էին, որ պատրաստ են «պատժել» Էրդողանին:

https://www.tert.am/am/news/2019/04/01/turkey/2962026

Leave a Reply

Your email address will not be published. Required fields are marked *