«ԱՄԵՆ ՏԱՐԻ ԱՊՐԻԼԻՆ ՈՐՊԵՍ ԽՈՇՏԱՆԳՄԱՆ ՄԻՋՈՑ ՄԵՐ ԴԵՄ Է ԳՈՐԾԱԴՐՎՈՒՄ ՑԵՂԱՍՊԱՆՈՒԹՅԱՆ ՀԱՐՑԸ»

Հ. ՉԱՔՐՅԱՆ

Հայտարարել է վարչապետ Էրդողանի կառավարության խոսնակ Ջեմիլ Չիչեքը

Ամեն անգամ, երբ ԱՄՆ Կոնգրեսի Ներկայացուցիչների պալատում օրակարգային է դառնում Հայոց ցեղասպանության բանաձեւի քվեարկության հարցը, Թուրքիան մատնվում է խուճապի: Թուրքական կառավարությունը բանաձեւի քվեարկությունը կանխարգելելու խնդրանքով, որպես կանոն, դիմում է ամերիկյան վարչակարգի միջամտությանը, քաղաքական շրջանակները երկրում հակաամերիկյան հիստերիա են հրահրում, իսկ թուրքական մամուլը, դառնալով ինչպես կառավարության, այնպես էլ այս շրջանակների թարգմանը, ԱՄՆ-ում բանաձեւի հնարավոր քվեարկության համար մեղադրում է հայաստանաբնակ եւ սփյուռքի հայությանը:

Այսպիսով, երկրում հրահրվող հակաամերիկյան հիստերիան համադրվում է հակահայկականի հետ, եւ Հայաստանը դառնում է թուրքական հարձակումների թիրախ: Այս ամենի առումով բացառություն չկազմեց Ներկայացուցիչների պալատում բանաձեւի քվեարկությունը օրակարգային դարձնելու Նենսի Փելոսիի վերջին նախաձեռնությունը: Նախագահ Բարաք Օբամայի վարչակարգի ճնշումները տիկին Փելոսիի վրա ի զորու կլինե՞ն կանխարգելել քվեարկությունը, դժվար է կանխատեսելը: Բայց որ վարչապետ Էրդողանի կառավարությունը ԱՄՆ-ում գործող թուրքական միությունների աջակցության բոլոր միջոցներով պայքարում է օրակարգում հայկական բանաձեւի հնարավոր ընդգրկման ու քվեարկության դեմ, ակնհայտ է:

Խոսքը տվյալ դեպքում Թուրքիայի վարչապետի դեկտեմբերի 19-ին նախագահ Օբամային ուղարկած նամակի եւ նախարարների խորհրդի հայտարարության մասին է: Էրդողանի նամակի մասին Թուրքիայի ազգային ժողովումՙ Մեջլիսում հայտարարել է արտգործնախարար Դավութօղլուն, ապա եւ պատասխանել լրագրողների հարցերին, իսկ նախարարների խորհրդի հայտարարությունը մամուլի ասուլիսում հրապարակել է փոխվարչապետ եւ կառավարության խոսնակ Ջեմիլ Չիչեքը:

Մեջլիսում Դավութօղլուն, ըստ «Միլլիեթի», ասել է. «Օրերս վերստին ականատես ենք լինում Թուրքիայի դեմ ուղղված այսպես կոչված ցեղասպանության բանաձեւերը օրակարգային դարձնելու ջանքերին, որոնք ԱՄՆ-ի Ներկայացուցիչների պալատում գործադրվել էին ուրբաթ օրը, գիտենք, որ գործադրվելու են նաեւ վաղըՙ երեքշաբթի:

Մենք այլեւս չենք կարող թույլ տալ, որ այս կարգի բանաձեւերը դամոկլյան սրի նման ճոճվեն ԱՄՆ-ի հետ Թուրքիայի հարաբերությունների վրա: Դրա առնչությամբ մեծարգո վարչապետը նամակ է ուղարկել նախագահ Օբամային: Զրպարտությունների եւ հիշողության պարտադրանքների դեմ թուրք ազգը վճռականորեն է տրամադրված ազգային արժանապատվությունը պաշտպանելու հարցում: Համոզված եմ, որ մեր Մեջլիսը կցուցաբերի այդ նույն զգոնությունը, ինչ մինչ այդ ցուցաբերել էր»:

Մեջլիսի հետնաբեմումՙ լրագրողների հետ հանդիպմանը Դավութօղլուն ասել է. «Տա Աստված, ներկայացուցիչների պալատը ԱՄՆ-ի հետ Թուրքիայի հարաբերությունները փորձաքննության ենթարկող որեւէ որոշում չընդունի»: Այսինքն, նա դրանով միանգամայն հավանական է համարել հայկական բանաձեւի քվեարկության հարցի մուտքը Ներկայացուցիչների պալատի օրակարգ:

Ինչ վերաբերում է փոխվարչապետ Չիչեքին, ապա նա էլ մամուլի ասուլիսում, կարեւորելով ԱՄՆ-Թուրքիա հարաբերությունների նշանակությունը, ընդգծել է. «Չհաշված առանձին ելեւէջերը, նույնիսկ ժամանակ առ ժամանակ տեղի ունեցող վթարները, մեր հարաբերությունները ավելի քան կես դար ընթացել են երկու երկրների համար նպաստավոր հունով: Մենք մշտապես շփման մեջ ենք ամերիկյան վարչակարգի հետ: Համոզված ենք, որ ԱՄՆ-ի ղեկավարները, գործելով ավելի սառնասիրտ եւ շրջահայաց, թույլ չեն տալու որոշ լոբբիների, որ վնասվեն այս հարաբերությունները: Մենք ճիշտ չենք համարում այն, որ ամեն տարի ապրիլ ամսվա նախօրեին այդ հարցը որպես խոշտանգման միջոց օգտագործվի մեր դեմ»:

http://www.azg.am/AM/2010122201

Leave a Reply

Your email address will not be published. Required fields are marked *