Հռոմի Մերուլանա պալատում կայացել է «1915 թ. Հայոց ցեղասպանության հիշողություն և ցեղասպանությունների կանխարգելում» խորագրով համաժողով

Դեկտեմբերի 10-ին դեսպանության նախաձեռնությամբ Հռոմի Մերուլանա պալատում կայացավ 1915 թ. Հայոց ցեղասպանության հիշողություն և ցեղասպանությունների կանխարգելում խորագրով համաժողովը, որը կազմակերպվել էր Ցեղասպանության հանցագործությունը կանխարգելելու և պատժելու մասին կոնվենցիայի և Մարդու իրավունքների հռչակագրի 70-ամյակի առիթով:

Իր ելույթում կարևորելով պատմության ճշմարտացիությունը, հիշողության կարևորությունը և արդարության հանդեպ վստահությունը՝ դեսպան Բաղդասարյանը նշեց. «Ավելի քան 100 տարի է անցել 20-րդ դարի առաջին ցեղասպանությունից, երբ Օսմանյան կայսրությունում զոհ գնաց 1.5 միլիոն հայ, սակայն այսօր էլ մեր աչքի առջև կատարվող էթնիկ և կրոնական խմբերի դեմ ինքնությամբ պայմանավորված հանցագործությունները բացահայտ կերպով ի ցույց են դնում, որ աշխարհը զերծ չէ այս նողկալի արհավիրքից: Միջազգային հանրության համար սա հերթական ահազանգն է առ այն, որ ցեղասպանությունների ու մարդկայնության դեմ հանցագործությունների վտանգն ամենևին չի վերացել և պահանջում է միջազգային կառույցների, պետությունների ու քաղաքացիական հասարակության համախմբված և հետևողական քայլեր»:

Համաժողովը վարում էր իտալական հայտնի «Կորիերա դելա Սերա» օրաթերթի լրագրող Մաուրիցիո Կապրարան (Maurizio Caprara):
Բանախոսների թվում էին հայազգի գրող Անտոնիա Արսլանը (Antonia Arslan) («Արտույտների ագարակը» վեպի հեղինակը), Հռոմի հայրապետական Արևելագիտության համալսարանի կանոնիկ իրավունքի ֆակուլտետի արտակարգ պրոֆեսոր հայր Ջորջ Հենրի Ռույսենը (Georges-Henri Ruyssen), Սիենայի համալսարանի մարդու իրավունքների պատմության պրոֆեսոր Մարչելո Ֆլորեսը (Marcello Flores) և Միլանի գիտությունների համալսարանի հանրային իրավունքի ինստիտուտների պրոֆեսոր Բարբարա Ռանդացոն (Barbara Randazzo), Միլանի համալսարանի հայոց լեզվի պրոֆեսոր Պայքար Սիվազլյանը:

Համաժողովի ավարտին Գրիգոր Նարեկացու, Կոմիտասի և այլ ստեղծագործություններով հանդես եկան մենակատար Մարինե Գրիգորյանը, դուդուկահար Արամ Իպեկջյանը և ջութակահար Մաուրիցիո Ռեդեգոսո Խաչատրյանը:

http://shamshyan.com/hy/article/2018/12/13/1112713/

Leave a Reply

Your email address will not be published. Required fields are marked *