Թուրքիայի դիվանագիտական կորպուսն իրար է անցել. Մեծ Եղեռնի ճանաչման հավանականությունը մեծ է

Թուրքիայի դիվանագիտական կորպուսն իրար է անցել՝ փորձելով կանխել Հայոց ցեղասպանությունը ճանաչող բանաձևի ընդունումն ԱՄՆ Կոնգրեսում: Նշենք, որ Կոնգրեսի Ներկայացուցիչների պալատի ներկայիս խոսնակ Նենսի Փելոսին փորձում է մինչ իր լիազորությունների ավարտը՝ 2011 թ-ի հունվարի 3-ը, Հայոց ցեղասպանությունը ճանաչող թիվ 252 բանաձևը ընգրկել օրակարգ՝ քվեարկության համար։ Հավելենք նաև, որ թիվ 252 բանաձևը կարող է քվեարկության դրվել 48 ժամվա ընթացքում:

Ինչպես փոխանցում է Hurriyet-ը, Թուրքիայի արտգործնախարար Ահմեթ Դավութօղլուն հեռախոսազրույց է ունեցել ԱՄՆ պետքարտուղար Հիլարի Քլինթոնի հետ: Թուրքիայի արտաքին քաղաքական գերատեսչության ղեկավարն իր ամերիկացի գործընկերոջը խնդրել է «ջանքեր գործադրել կանխելու համար «հայկական բանաձևի» քվեարկությունը»: Քլինթոնն էլ նշել է, թե իրենք «ևս կողմ են օրինագիծն արգելափակելուն, և այդ ուղղությամբ ջանքեր կգործադրվեն»:

Ավելի վաղ ԱՄՆ-ում Թուրքիայի դեսպան Նամըք Թանը ցինիկորեն կոչ էր արել ամերիկյան հասարակությանը «ողջախոհություն ցուցաբերել» և «նման քայլի չգնալ»:

Թուրքիայի պետական Anadolu գործակալության փոխանցմամբ՝ թիվ 252 բանաձևն այսօր չի դրվի քվեարկության: Գործակալությունը նաև հավելում է, որ մինչ դեկտեմբերի 21-ն աշխատանքները շարունակող Կոնգրեսը դեռ կարող է բանաձևը դնել քվեարկության:

HayNews.am

Leave a Reply

Your email address will not be published. Required fields are marked *