Թուրքիան ԵՄ-ից պահանջում է երկրի անդամակցության շուրջ հստակ դիրքորոշում հայտնել

Թուրքիան Եվրոպական Միությունից պահանջում է հստակ ասել, թե արդյոք ցանկանում են երկրին տեսնել ԵՄի անդամների շարքում: Այդ մասին հայտարարել է Թուրքիայի նախագահ Ռեջեփ Թայիփ Էրդողանը, որը այցով գտնվում է Վարշավայում:

Նախագահ Էրդողանը նշել է, որ իր երկիրը դեռևս վաղուց ձգտում է դառնալ Եվրոպական միության անդամ, և իր նկատմամբ ներկայացվող պահանջներն անընդհատ աճում են: «Ես կցանկանայի հստակ կարծիք լսել: Եթե ցանկանում եք Թուրքիային ընդունել Եվրոպական միություն, ապա ասեք մեզ դրա մասին, եթե չեք ցանկանում, ապա այդ մասին ևս ասեք»,-նշել է Էրդողանը:

Թուրքիան 1963 թ. ստորագրել է Եվրոպական միության հետ ասոցացման համաձայնագիր, իսկ 1987 թ. միությանն անդամակցելու հայտ է ներկայացրել: Մինչդեռ անդամակցության շուրջ բանակցությունները սկսվել են միայն 2005 թ. և տարաձայնությունների պատճառով բազմիցս դադարեցվել:

Ներկայում բաց են բանակցային գործի 35 գլուխներից 16-ը: Նախորդ տարվա մարտին Բրյուսելը ակտիվացրել է բանակցությունները Թուրքիայի հետ՝ Եվրոպայում փախստականների հոսքի կրճատմանն աջակցելու համաձայնության փոխարեն:

Թուրքիայի և Եվրոպական միության միջև հարաբերությունները վատթարացել են Թուրքիայում նախորդ տարվա հուլիսին տեղի ունեցած ռազմական հեղաշրջման փորձից հետո. Եվրոպական Միությունը քննադատել է թուրքական իշխանությունների հետագա արձագանքը:

Հատկապես սրվել են Ավստրիայի հետ Թուրքիայի հարաբերությունները: Ավստրիան պնդում է, որ ԵՄ Թուրքիայի անդամակցության շուրջ բանակցությունները պետք է դադարեցվեն:

Լարված են նաև Գերմանիայի հետ հարաբերությունները, որը հայտարարել է Անկարայի հետ հարաբերություններում տնտեսական քաղաքականությունը, վարկային և ներդրումային ծրագրերը վերանայելու մասին:

http://ankakh.com/article/81701/%E2%80%8Bthurqian-yem-its-pahandjum-e-yerkri–andamaktsuthyan–shurdj-hstak-dirqvorvoshum–haytnyel

Leave a Reply

Your email address will not be published. Required fields are marked *