Ի՞նչ են պատմում Կիլիկյան Հայաստանի Վահկա ամրոց այցելած հայ ուխտավորները

Հայրենասեր հայորդիներից բաղկացած խումբը, որ օրերս եղել է Կիլիկյան Հայաստանի Վահկա ամրոցումMAMUL.amի թղթակցի հետ զրույցում կիսվել է հետաքրքիր տպավորություններով: Համլետ Հովսեփյանը պատմում է, որ Սիս ամրոցից հետո ուղևորվել են Վահկա, որը 50 կմ հեռավորության վրա է, ճանապարհին շատ են հանդիպել ջրառատ գետերի ու ջրամբարների։

«Բերդը, որը մի փոքր դժվարությամբ գտանք, մի փոքրիկ գյուղի տարածքում է։ Դեպի գլխավոր մուտք տանող ճանապարհը մի գյուղացու հողամասի միջով է անցնում, դրա համար պետք էր նախ թույլտվություն խնդրեինք բարձրանալու համար։ Թույլտվություն ստանալուց հետո հողամասից շարժվեցինք դեպի բերդ։ Առաջին հայացքից սովորական հողամաս էր, բայց բոլորիս մի բան խիստ զարմացրեց։ Հողամասի մեջ մի քանի նոր գերեզմաններ կային։

Բարձրացանք բերդ։ Թուրքերը վերականգնողական աշխատանքներ էին տանում։ Բայց այդ պահին մարդ չկար։ Ցավոք բերդի պատերին ոչ մի հայերեն գրառում կամ այլ հայկական հետքեր չգտանք։ Տեղում ազգայնական կուսակցությունն է իշխանության գլխին, երևի թե դրա պատճառով էլ բերդի վրայի հայկական հետքերը վերացրել էին։ Օրինակ Կոռիկոսի, Անավարզայի, Սելևկիայի և Կիլիկիայի շատ այլ բերդերի պատերին դեռ հայերեն գրառումներ պահպանվել են։ Բերդի ներսում մի կիսաքանդ կառույց կար, որը եկեղեցու շատ էր նման։

Այդպես ոգևորված այս հրաշք բերդով՝ բարձրացանք ամենաբարձր աշտարակ և սկսեցինք խրոխտ ձայնով ֆիդայական երգեր երգել։ Քանի որ չորսբոլորը լեռներ էին, մեր ձայներն ուժեղ արձագանքում էին։ Մեր խմբի անդամներից մի քանիսն ուսերին հայկական դրոշներ էին կրում։ Այդպես մոտ մեկ ժամից ավելի մնացինք բերդում։ Իջնելուն պես մեզ անակնկալ էր սպասվում։

Տեղացի ազգայնական թուրքերը կարծել էին, թե մենք Քրդական բանվորական կուսակցության անդամներ ենք, ու եկել ենք, բերդը գրավել։ Մեր վարորդն ու խմբից մի քանի հոգի բերդ չբարձրացան հետներս և ներքևում էին մնացել։

Մենք քանի դեռ վերևում էինք, մի քանի հոգի եկել էին ու փորձել իրենցից հաշվեհարդար տեսնել մահակներով։ Բարեբախտաբար, մենք իջանք ու մեր ուղեկցորդը կարողացավ հասկացնել, որ ոչ մի քրդական կազմակերպության հետ կապ չունենք ու սովորական զբոսաշրջիկներ ենք։ Եվ լավ էր` համոզվեցին, թե չէ ցանկանում էին ոստիկանություն զանգել»,- պատմում է Համլետ Հովսեփյանը:

Նա նաև նշում է, որ բերդին ամենամոտ գտնվող քաղաքը նույնպես Վահկա է կոչվում, այն ունի մոտ 6000 բնակչություն, բոլորն՝ ազգայնական թուրքեր: Ի տարբերություն Ադանայի՝ այստեղ այնքան էլ ջերմ չեն ընդունում հայերին և անգամ տեղյակ չեն, որ այդ բերդերը հայերն են կառուցել:

Mamul.am

Leave a Reply

Your email address will not be published. Required fields are marked *