Յասին Հայալը Դինքի սպանության համար 2006թ. ամռանը զենք էր փնտրում. հետախուզության նախկին պաշտոնյա

Ստամբուլում նախօրեին կայացել է պոլսահայ լրագրող, «Ակօս» թերթի հիմնադիր և խմբագիր Հրանտ Դինքի սպանության գործով հերթական դատական նիստը, որի ընթացքում պաշտպանական ճառով հանդես է եկել Տրապիզոնի ժանդարմերիայի հետախուզական վարչության նախկին պաշտոնյա Վեյսել Շահինը, այս մասին գրում է «Ակօսը»:

Շահինը պատմել է, որ հետախուզությունը հստակ իմացել է Դինքի սպանության նախապատրաստության մասին, սակայն որևէ բան չի ձեռնարկել: Նախկին պաշտոնյան խոստովանել է, որ իրեն հասած տեղեկության համաձայն՝ Դինքին ցանկացել է սպանել մեղադրյալներից Յասին Հայալը:

«2006թ. հուլիս-օգոստոս ամիսներին էր, ծանոթներիցս մեկն ինձ զանգահարեց, ցանկացավ հանդիպել: Ես և իմ անմիջական ղեկավար Օքան Շիմշեքը գնացինք, մեզ փոխանցեցին, որ Յասին Հայալը ցանկանում է սպանել հայ լրագրող Հրանտ Դինքին և դրա համար զենք է փնտրում: Նույնիսկ ասացին՝ «Չլիցքավորված զենք տվեք, հետո բռնեք, թող հրաժարվի այդ մտքից»: Մենք ասացինք, որ նման բան չենք կարող անել: Շիմշեքը զանգահարեց վերադաս Մեթին Յըլդըզին, տեղեկությունը փոխանցեցինք: Մյուս առավոտ թեմայի շուրջ ժողով հրավիրվեց, ես չմտա: Լսեցի, որ Մեթին Յըլդզըզն ու Օքան Շիմշեքը Դինքի մասին խոսել են ժողովի ժամանակ», – պատմել է Շահինը, ում պնդմամբ՝ ավելի ուշ՝ Դինքի սպանությունից հետո, նրանց ստիպել են կեղծ վկայություն տալ ու հերքել տեղի ունեցածը:

Նշենք, որ նախորդ դատական նիստերից մեկի ժամանակ գործով անցնող լրագրող Էրջան Գյունը պատմել է, որ իր ձերբակալությունից հետո նա Ժանդարմերիայի նախկին աշխատակիցներից Վեյսել Շահինից տեղեկացել է, որ Դինքի գործով մեղադրյալներից Յասին Հայալը սպանությունից 15 օր առաջ ակտիվ կապի մեջ է եղել Հետախուզական կոմիտեի հետ և պարբերաբար այցելել է կառույցի գործակալներին:

«Ժանդարմերիայից Վեյսել Շահինն ասաց, որ լսել է, թե Հայալը Տրապիզոնում գնում-գալիս է Հետախուզական կոմիտե և հանձնարարություն է ստացել: Դա տեղի է ունեցել սպանությունից դեռ 15 օր առաջ: Իսկ թե ի՞նչ հանձնարարություն է ստացած եղել՝ ժանդարմը չգիտեր: Ասաց՝ չեմ ուզում ինձ խնդիրների մեջ գցել», – պատմել էր Գյունը:

Ի դեպ, դեռևս 2012թ. Հրանտ Դինքի սպանության կազմակերպման մեղադրանքով ցմահ ազատազրկման դատապարտված Յասին Հայալը նամակ էր գրել դատարան` պնդելով, որ սպանության գլխավոր մեղավորը գործով արդարացված Էրհան Թունջելն է:

Հիշեցնենք, որ պոլսահայ հայտնի լրագրող, մտավորական, «Ակօս» թերթի հիմնադիր և խմբագիր Հրանտ Դինքը սպանվել է 2007թ. հունվարի 19-ին` Ստամբուլի Շիշլի թաղամասում գտնվող «Ակօս» թերթի խմբագրատան առջև` 16-ամյա թուրք ազգայնական Օգյուն Սամասթի կրակոցից: Հրանտ Դինքի սպանության վերաբերյալ դատավարությունը ձգվում է արդեն 10 տարի և դեռևս չի գտել իր հանգուցալուծումը:

http://www.tert.am/am/news/2017/10/06/dink/2503707

Leave a Reply

Your email address will not be published. Required fields are marked *