Թուրքական հերթական հերյուրանքը. «Թուրքական բանակի որոշ հրամանատարներ կարող է գյուլենական ծպտյալ հայեր լինեն»

«Միջազգային անհիմն հայկական պնդումների դեմ պայքարի միության»` ASİMDER-ի նախագահ Գյոքսել Գյուլբեյը հանդես է եկել հերթական հերյուրանքով, համաձայն որի` «Գյուլենական հրամանատարները կարող է ծպտյալ հայեր լինեն»: Այդ մասին, ըստ Akunq.net-ի, հաղորդում են թուրքական լրատվամիջոցները: 

Աղբյուրի համաձայն` ASİMDER-ի նախագահը մասնավորապես հայտարարել է, թե Առաջին աշխարհամարտի ժամանակ պետության արևելքում որբ մնացած երեխաներին հավաքած Քազըմ Կարաբեքիր փաշան լուծել է նրանց` տարբեր մասնագիտություններով ապահովելու հարցը: Գյոքսել Գյուլբեյը, բնականաբար, չի նշել, թե իրականում ինչու՞ էին այդքան մեծ թվով հենց հայ, այլ ոչ թե թուրք կամ քուրդ երեխաներ որբ մնացել Արևմտյան Հայաստանի տարածքներում, այլ միայն ասել է, որ 4 հազար որբ երեխաների մեջ եղել են նաև հայ մանուկներ, ովքեր հետագայում սպա են դարձել թուրքական բանակում և ենթադրել, թե 2016 թ. հուլիսի 15-ի հեղաշրջման փորձն իբր իրականացրած գյուլենական կազմակերպության անդամ հրամանատարները կարող է հենց այդ հայ երեխաները կամ նրանց հետնորդները լինեն:

ASİMDER-ի նախագահը հիշելով, որ 1960 թ. հեղաշրջման ժամանակ օդային ուժերի գնդապետ Հայդար Թուչքանաթը ևս այդ հայ երեխաներից մեկն էր եղել, նաև հայտնել է. «Հարկ է ուսումնասիրել հուլիսի 15-ի հեղաշրջման փորձ կատարած գյուլենական ահաբեկչական կառույցի անդամ սպաների տոհմածառը: Եթե ներկայում այդ որբ երեխաներից մեր բանակում պաշտոն զբաղեցնողներ կան, ապա նրանք կարող է անհանջողության մատնեն ՊԿԿ ահաբեկչական կազմակերպության դեմ մեր պայքարը և դավաճանեն մեր պետությանը, քանի որ նրանք մուսուլման թուրք ժողովրդին են պատասխանատու համարում Առաջին աշխարհամարտի ժամանակ  իրենց ընտանիքների սպանության համար: Սույն ատելությունը կարող է ամեն տեսակի դավաճանության մղել այդ ծպտյալ սպաներին: ASİMDER միությունը պահանջում է, որ մեր պետության իրավասու մարմինները միջոցներ ձեռնարկեն` նման սպաների ծագումն ուսումնասիրելու ուղղությամբ: Մենք պաշտոնապես դիմել ենք նախագահական մարմնին և վարչապետարանին` այդ հարցի կապակցությամբ»:

Հիշեցնենք, որ նույն Գյոքսել Գյուլբեյը վերջերս հայտարարել էր նաև, որ Թուրքիայում ապրում են 37․055 ծպտյալ հայ ընտանիքներ:

Իր հակահայկական հայտարարություններով ու գործունեությամբ հայտնի ASİMDER-ի նախագահն այնքան է տարված իսլամացված հայերի նկատմամբ ևս ատելություն սերմանելու մոլուցքով, որ անգամ չի էլ զգում, թե որքան անտրամաբանական է իր ենթադրությունը` հատկապես տարիքային առումով: Ինչպե՞ս կարող են Ցեղասպանության ժամանակ 4-5 տարեկան եղած երեխաները ներկայում դեռ ծառայել թուրքական բանակում:

Բնականաբար, այս կերպ հակահայ թուրք գործիչները փորձում են ատելություն սերմանել նաև իսլամացված հայերի նկատմամբ և, ինչպես միշտ, իրենց բոլոր խնդիրների համար որոնել երևակայական թշնամիներ ու մեղադրել հայերին:

Հիշեցնենք, որ Ազգայնական շարժման տարիներին Արևելյան ռազմաճակատի հրամանատարը եղած Քազըմ Կարաբեքիրը Էրզրումի (Կարին) շրջակայքում փողոցներից կամ էլ նրանց խնամել անկարող ազգականների մոտից հավաքել էր որբ մնացած 2000 աղջիկ, 4000-ի չափ էլ տղա երեխաներ և տղաներից ստեղծել Gürbüzler Ordusu-ն (Առույգ պատանիների բանակը): Այս մանուկները ստացել էին ռազմական կրթություն, անգամ դահուկորդի դասընթացներ անցել, նրանց մի մասն արհեստներ էր սովորել Արդյունաբերական դպրոցում, որը հագուստ և կոշիկ էր մատակարարում քեմալական բանակին: Անկախ նրանից, թե որտեղ էին նրանց տեղավորում, բոլորին էլ դաստիարակում էին թրքության գիտակցությամբ:

Կարաբեքիրի պահպանության տակ առնված ծնողազուրկ տղա երեխաների մեջ կային նաև հայ որբեր: Այս մանուկների շարքում առավել ընդունակները Կարաբեքիրի կողմից ուղարկվել էին Բուրսայի նորաբաց Ըշըքլար ռազմական լիցեյը` այնպես ներկայացվելով, թե իբր նրանք թուրք ընտանիքների որբեր էին, իսկ մնացածները մասնագիտություն էին ստացել և կյանք մտել: Թուրքերը Կարաբեքիրի այս գործունեությունը փորձում են ներկայացնել որպես մարդասիրական գործ` չփորձելով անգամ հարցնել, թե իրականում ինչո՞ւ էին տվյալ շրջաններում այդքան մեծ թվով հայ երեխաներ որբացել:

Կարաբեքիրի հիմնած սույն բանակը հիշեցնում է դևշիրմեի միջոցով ստեղծված ենիչերիների զորաբանակը: Հիրավի, գաղափարը գրեթե նույնն էր. դեռևս գիտակցական մակարդակի չհասած այլազգի երեխաներին դաստիարակել որպես մոլի մուսուլման և թուրք` ընդդեմ սեփական ժողովրդի:

Մելինե Անումյան

Akunq.net

Leave a Reply

Your email address will not be published. Required fields are marked *