Պահչէլի պիտի մասնակցի կիրակիի հանրահաւաքին

ՄարմարաԹուրքիոյ քաղաքական շրջանակներուն ամբողջ ուշադրութիւնը այժմ սեւեռուած է 7 Օգոստոսի Ենիգափուի հրապարակի հանրահաւաքին վրայ, որ պետական ձախորդ հարուածի դէմ ցուցաբերուած ուժի նոր մէկ արտայայտութիւնը պիտի դառնայ։ Մեծ թիւով արուեստագէտներ արդէն յայտնեցին, որ պիտի գան ու ելոյթներ պիտի ունենան հանրահաւաքի ընթացքին։

Շատեր կը սպասէին, որպէսզի տեսնէին, թէ ինչ պատասխան պիտի տայ Հէ-Տէ-Փէի կուսակցապետ Տէվլէթ Պահչէլի, որ Քըլըճտարօղլուի հետ միասին հրաւիրուած էր մասնակցելու ու ճառախօսելու։ Քըլըճտարօղլու յայտնած էր, որ ինք պիտի չերթայ ու պատուիրակութիւն մը պիտի ղրկէ։ Իսկ Պահչէլի երէկ իր համացանցի էջէն պաշտօնապէս հաղորդեց, որ սիրով պիտի մասնակցի այս հանրահաւաքին։ Պահչէլի գրի առաւ նաեւ երկարաշունչ հաղորդագրութիւն մը, ուր յայտնելէ վերջ թէ պիտի մասնակցի “Ժողովրդավարութեան ու նահատակներու հանրահաւաք” կոչուած այս հաւաքոյթին, պախարակեց Ֆէթհուլլահի կազմակերպութիւնը ու ըսաւ, որ ցարդ Թուրքիա ո´չ մէկ տեղէ այնքան մեծ վնաս տեսաւ, որքան տեսաւ այս կազմակերպութենէն։ Յիշեցնելով, որ Թուրքիա շատ դաւադրութիւն տեսած է իր պատմութեան մէջ, ըսաւ, որ պիտի չարտօնուի, որ երկիրը բաժան-բաժան ըլլայ։ “Ուրիշին զիջելու մէկ խճաքար անգամ չունինք, ահաբեկիչներու ձգելու ափ մը հող չունինք”, – ըսաւ Պահչէլի։

Պահչէլիի այս պատրաստակամութիւնը գոհունակութիւն ստեղծեց Անգարայի մէջ, նախագահ Էրտողան իր կարգին համացանցի իր էջերուն մէջ արտագրեց Պահչէլիի խորհրդածութիւնները։

Leave a Reply

Your email address will not be published.