ԵԽԽՎ վաղվա նիստում ադրբեջանական եւ թուրքական պատվիրակները կօգտագործեն Արամ Աթեշյանի անպարկեշտ նամակը

Արամ ԱթեշյանԵԽԽՎում թե՛ ադրբեջանական, թե՛ թուրքական պատվիրակները այս նստաշրջանում որպես քարտ բլանշ կօգատոգործեն Պոլսո Հայոց պատրիարքի փոխանորդ Արամ արքեպիսկոպոս Աթեշյանի անպարկեշտ նամակն` ուղղված Թուրքիայի նախագահին, որով դատապարտում էր Գերմանիայի կողմից ցեղասպանության ճանաչումը: Այս մասին NEWS.amի հետ զրույցում ասաց ԵԽԽՎում Հայաստանի պատվիրակության անդամ Նաիրա Զոհրաբյանը:

«Այս նստաշրջանում կոնկրետ Հայաստանի վերաբերյալ զեկույց չկա, բայց ինչպես բոլոր նստաշրջաններում, բազմաթիվ զեկույցներ կան, որոնց կոնտեքստում բնականաբար մենք խոսելու ենք մեր օրակարգում եղած խնդիրների մասին»:

Նաիրա Զոհրաբյանը շեշտեց, որ զեկույցներ կան Թուրքիայում ժողովրդավարական ինստիտուտների վերաբերյալ, որտեղ լրջագույնս քննադատվում է Թուրիայում խոսքի ազատությունը: Ըստ պատգամավորի` թուրքական եւ ադրբեջանական պատվիրակություններն էլ որպես քարտ բլանշ օգտագործելու են Արամ Աթեշյանի աղմկահարույց նամակը:

«Թուրքական պատվիրակության վիճակը բնավ շահեկան չի լինելու` հաշվի առնելով, որ օրակարգում նախատեսված է Թուրքիայում ժողովրդավարական ինստիտուտների գործունեության վերաբերյալ զեկույց, որտեղ լրջագույնս քննադատության է ենթարկված Թուրքիայում խոսքի ազատության վիճակը: Թե՛ ադրբեջանական, թե՛ թուրքական պատվիրակները որպես քարտ բլանշ կօգտագործեն Արամ Աթեշյանի այդ անբարո, անպարկեշտ նամակն` ուղղված Թուրքիայի նախագահին»,- ասել է Զոհրաբյանը:

Ինչ վերաբերում է ապրիլյան պատերազմի վերաբերյալ նախորդ նիստում բարձրացված ելույթների զարգացումներին, Զոհրաբյանն ասաց . «Ապրիլյան պատերազմում Ադրբեջանի կողմից կատարած հանցագործությունների թեման, բնականաբար, շարունակվելու է: Օրերս Եվրոպայի խորհրդի ընդդեմ ռասիզմի եւ անհանդուրժողականության հանձնաժողովը շատ կարեւոր մի զեկույց հրապարակեց Ադրբեջանում հայատյացության եւ ատելության մթնոլորտի ձեւավորման մասին, դեռեւս մի քանի տարի առաջ ես նշյալ հանձնաժողովին ուղարկել էի ադրբեջանական դասագրքերից հստակ հատվածներ, որոնք ցանկացած սթափ տրամաբանող մարդուն կարող են գցել ցնցումների մեջ: Օրինակ, հարց աշակերտին. ե՞րբ է հղի ադրբեջանուհու սրտի զարկը հասնում 160-ի: Այս հարցին տրված է մի քանի պատասխան, որից ճիշտը հետեւյալն է. երբ որ հղի կինը Ղարաբաղի լեռներում մազապուրծ փախչում է հայ ջարդարարներից: Կամ 5-րդ դասարանի դասագրքից հետեւյալը. քանի՞ անդամահատված հաշմանդամ կա Ադրբեջանում, որոնք իրենց վերջույթները կորցրել են ղարաբաղյան պատերազմի ժամանակ, եւ սրանք դասագրքերում ամենամեղմ օրինակներն են: Թեկուզ ուշացումով, բայց արդեն անդրադարձ կա սրան»:

http://news.am/arm/news/332983.html

Leave a Reply

Your email address will not be published. Required fields are marked *