Կհրատարակվի պատմական հայրենիքի 10.000 բնակավայրերի մասին 36 հատորյա գրքաշար՝ Ցեղասպանության տարելիցին ընդառաջ

Սամվել ԿարապետյանՀայկական ճարտարապետությունն ուսումնասիրող հիմնադրամը շուտով կհրատարակի «Հայաստանի պատմություն»՝ հայրենիքի 10.000 բնակավայրերի մասին 36 հատորյա գրքաշարը, որն արդեն հոկտեմբերին վերջնական տարբերակով կհանձնվի տպարանին: Այս մասին հայտնեց հիմնադրամի ղեկավար Սամվել Կարապետյանը:

«Արևմտյան Հայաստանում կատարած ուսումնասիրությունների արդյունքում շատ նոր բացահայտումներ արեցինք, դեպի հարավ շատ հետաքրքիր հուշարձաններ արձանագրվեցին, հատկապես՝ Կարսի և Սարիղամիշի շրջաններում: Հիմնականում եկեղեցիներ են կամ վանքեր, գնալով գերակշռում են դիմափոր հուշարձանները: Իսկ ավելի մեծ թիվ կազմող քարաշեն կառույցների թիվը պակասել է, ինչ էլ կա, հետքեր են միայն: Նույնիսկ դիմափորները քանդվում են, ժայռերը պայթեցնում են»,-ասաց նա և ավելացրեց, որ, ցավոք սրտի, թուրքական իշխանությունները տասնամյակների ընթացքում հիվանդացրել են իրենց ժողովրդին՝ մշտապես հայկական գանձերի մասին թմբկահարելով, ու մինչև հիմա էլ դեռ թուրքերը հայկական հուշարձանների տակ գանձեր են փնտրում:

Դառնալով գրքաշարին՝ Սամվել Կարապետյանը նշեց, որ 36 հատորից բաղկացած մատենաշարի առաջին հատորում խորհրդանշական ձևով որոշել են ներկայացնել Հայոց ձոր գավառի շուրջ հարյուրից ավել գյուղերը:

Նա նաև ասաց, որ երբ բոլոր հատորները հերթով կողք կողքի դրվեն, պատմական Հայաստանի քարտեզի պատկերը կստացվի:

«Սա շատ մեծ նախագիծ էր, միայն տպագրությունը մեծ ծախսեր էր պահանջում, և սա մեր հիմնադրամի բյուջեում չէր կարող տեղավորվել, բայց այս մատենաշարը չհրատարակել չէինք կարող: Մտածեցինք բաժանորդագրության ճանապարհն օգտագործել, և հիմա պետք է տարածել բաժանորդագրության մասին, որպեսզի այն հրատարակվի»,-ասաց հիմնադրամի ղեկավարը։

Մատենաշարում ներառված կլինեն Մեծ և Փոքր Հայքի բոլոր գավառները. այն նվիրված է Մեծ եղեռնի անմեղ զոհերի հիշատակի ոգեկոչման 100-ամյակին:
http://www.tert.am/am/news/2014/08/01/genocide/

Leave a Reply

Your email address will not be published. Required fields are marked *