Ըստ պատմության պրոֆեսոր Հալաչօղլուի` Հայկական հարց գոյություն չունի

Դոկտոր, պրոֆեսոր Հալաչօղլուն, որն իր կոչն ուղղել էր ողջ աշխարհին և ասել` տեսեք ճշմարտությունը, Նյուրնբերգում տեղի ունեցած գիտաժողովի ժամանակ մեկ առ մեկ հերքեց հայերի և վերջիններիս համախոհների թեզերը: Գերմանիայի Նյուրնբերգ քաղաքում և շրջակա բնակավայրերում գործող 14 քույր թուրքական քաղաքացիական կազմակերպության ու «Schwabach» թուրքական մշակութային  միության նախագահ Սեյֆեդդին Քարագյոլի կողմից Նյուրնբերգ հրավիրված Թուրքական պատմագիտական ընկերության նախկին նախագահ, անվանի պատմաբան, դոկտոր, պրոֆեսոր Յուսուֆ Հալաչօղլուն մի զեկուցում կարդաց` «Հայկական հարցը և տեղահանությունը» թեմայով: Զեկուցումն ունկնդրեցին Նյուրնբերգի գլխավոր հյուպատոս Էջե Օզթյուրք Չիլը, հյուպատոսի տեղակալ Աբդուլլահ Թյուլյուն, հյուպատոսարանում աշխատանքի գծով կցորդ Քեմալ Ռամօղլուն և այլք:

Հայերը օսմանյան ժամանակաշրջանում

Դոկտոր, պրոֆեսոր Հալաչօղլուն, պատմելով օսմանյան ժամանակաշրջանում հայերի վիճակի մասին և նշելով, թե հայերը Առաջին համաշխարհային պատերազմի ընթացքում տեղափոխվել են դարձյալ Օսմանյան կայսրության այլ տարածքներ, որոնք գտնվում էին պատերազմական շրջաններից դուրս, անդրադարձավ նաև ներքին ու արտաքին գործոններին: Հալաչօղլուն շեշտեց, թե ինքն ուսումնասիրել է օսմանյան և ողջ աշխարհի փաստաթղթերը, և պրոյեկցիայի միջոցով ներկայացրեց բնագիր վավերագրեր:

Եկեք ճիշտը խոսենք, որ աշխարհը հանգիստանա

Պատմության պրոֆեսոր Յուսուֆ Հալաչօղլուն, ելույթի վերջում աշխարհին ուղերձ հղելով, հետևյալ մարտահրավերը նետեց. «Եկեք ճիշտը խոսենք, որ աշխարհը հանգիստանա»:

Թաներ Թյուզյունը հաղորդում է Նյուրնբերգից

Դողան լրատվական գործակալություն

www.haberler.com, 13.06.2010

 

Կայքէջի խմբագրության կաղմից: Յուսուֆ Հալաչօղլուն իր ելույթի համար շատ ճիշտ վայր է ընտրել՝ ցեղասպան ֆաշիստների դատավարության կենտրոնը,  քանզի ենթագիտակցորեն զգում է, որ հեռու չէ նաև երիտթուրքական ֆաշիզմի Նյուրնբերգը: Իսկ նման նյուրնբերգներում դատվում են ոչ միայն ցեղասպաններն ու ֆաշիստները, այլև՝ այդ երևույթները ժխտողները, նենգափոխողները, ուրացողներն ու արդարացողները:

Հալաչօղլուի հոգևոր հայր Թալեաթը համոզված էր, որ Հայկական հարց գոյություն չի ունենա այն ժամանակ, եթե գոյություն չունենան հայերը: Բայց հայերը կան ոչ միայն Հայաստանի Հանրապետությունում և աշխարհի մի քանի տասնյակ երկրներում. նրանք ապրում են նաև Արևմտյան Հայաստանում և Թուրքիայի զանազան շրջաններում, որոնց թիվը, նույն տխրահռչակ ՙպատմաբան՚ Հալաչօղլուի իսկ վկայությամբ, հասնում է մինչև մեկ ու կես միլիոնի, իսկ այլոց վկայությամբ ավելի շատ է:  Եթե հայերը կան, կա նաև Հայկական հարցը, դա Հալաչօղլուն կընդունի թե ոչ:

Պարո´ն ՙդոկտոր՚, կա այսպիսի մի արտահայտություն. ՙԱստված չկա, բայց Աստծուն ժխտողները շատ են՚, որը մի քանի հարցերի տեղիք է տալիս.

Հարց 1. Ինչպե՞ս կարելի է ժխտել գոյություն չունեցող անձը, առարկան կամ երևույթը (եթե Հալաչօղլուն, ՙզտարյուն պատմաբան՚ լինելուց զատ, մի քիչ էլ հետքրքրվեր երևույթների օրինաչափություններն ուսումնասիրող փիլիսոփայությամբ, կհասկանար, որ յուրաքանչյուր երևույթի ժխտում ինքնին այդ երևույթի հաստատումն է):

Հարց 2. Որտե՞ղ են Օսմանյան կայսրությունում ապրող միլիոնավոր հայերը, որոնց թիվը, համաձայն Թուրքիայի բնակչության աճի միջին տեմպերի, ամենահամեստ հաշվարկներով այսօր կազմելու էր 18-20 միլոն:

Հարց 3. Ինչու՞ են հայերը (նաև՝ մյուս քրիստոնյոներն ու ոչ մուսուլմանները) Թուրքիայում իսլամացել կամ ապրում են ծպտված, ինչպես Դուք էլ եք վկայում:

Հարց 4. Ինչու՞ են Թուրքիայում սպանվում ու հալածվում հայերը, այլ քրիստոնյաներ և, ընդհանրապես, ոչ թուրքեր:

Հարց 5. Ինչու՞ է, ըստ Թուրքիայի Հանրապետության սահմանադրության, թուրքիայի քաղաքացին թուրք. մի՞թե այլ ազգության ներկայացուցչին դա արգելված է: Իսկ գուցե Թուրքիայում այլ ազգեր չե՞ն ապրում: Այս դեպքում առաջանում է այլ հարց.

Հարց 6. Թուրքիայի վերածված այդ հսկայական տարածքից, որ  հազարամյակներ շարունակ  բազմաթիվ ազգերի բնօրրանն ու հայրենիքն էր, վերջիններս ու՞ր անհայտացան: Գուցե նրանք չկարողացա՞ն դիմանալ թուրքական պետության վեհանձնությանը, մեծահոգությանը, բարեխնամությանը, ազնվականությանը, հանդուրժողականությանն ու եղբայրական անդիմադրելի սիրուն: Թե՞ թուրքական առավել ՙբարձր՚ մշակույթն ու գիտությունը կլանեցին ՙհետամանաց՚ հայկական, հունական, ասորական… մշակույթները:

Պարո´ն ՙպրոֆեսոր՚, այս հարցերի պատասխաններն են ակնկալվելու ցեղասպան երիտթուրքերի ու նրանց հանցանքը ուրացողների ու ժխտողների Նյուրնբերգում, ուր ձեր ունկնդիրները, առավել ևս՝ հարց տվողները թուրք դիվանագետները և 14 թուրքական  քույր   կազմակերպությունները չեն լինելու:

  1 comment for “Ըստ պատմության պրոֆեսոր Հալաչօղլուի` Հայկական հարց գոյություն չունի

Leave a Reply

Your email address will not be published. Required fields are marked *