Ապրիլի 24-ին Ստամբուլում հարգելել են նաև 2011 թվականի այդ օրը Սասունում գտնվող թուրքական զորամասերից մեկում թուրք ծառայակցի կողմից սպանված Սևակ Բալըքչըի հիշատակը:
Այս մասին տեղեկացնում է CNNTurk-ը:
Սևակը թաղված է Բալըչքը ընտանիքի գերեզմանոցում, որը գտնվում է Շիշլի թաղամասի Գրիգորյան գերեզմանատանը:
Սևակի շիրիմին են այցելել նրա ծնողները, ազգականները, ընկերները, ինչպես նաև թուրք իրավապաշտպաններ և մտավորականներ, ովքեր իրենց դժգոհությունն են հայտնել նրա սպանության գործով դատավարությունից:
Հիշեցնենք, որ պոլսահայ Սևակը սպանվել էր 2011 թվականի ապրիլի 24-ին, երբ պարտադիր զինծառայություն էր անցնում Սասունի զորամասերից մեկում: Նրա զորացրմանը մնացել էր ընդամենը 23 օր:
Փաստերը ցույց են տալիս, որ հայազգի զինծառայողը սպանվել է էթնիկ հողի վրա, այն էլ` Հայոց ցեղասպանության զոհերի հիշատակի օրը: Վկաներից մեկի ցուցմունքից հայտնի էր դառնում, որ Աղաօղլուն սպառնացել էր Սևակին` ասելով. «Թմբլիկ, ես քեզ սպանելու եմ»:
Այնուամենայնիվ, Դիարբերքիրի ռազմական դատարանը 2013 թվականի մարտ ամսին հրապարակել էր դատավճիռը` Սևակի սպանությունը համարելով «ոչ կանխամտածված»:
Մարդասպանը` Քըվանչ Աղաօղլուն, դատարապարտվել էր 4,5 տարվա ազատազրկման, որից հանվել էր մինչ վճիռը նրան կալանքի տակ պահելու ժամկետը (մոտ 1,5 տարի): Այսպիսով, մարդասպանը ճաղերի հետևում է անցկացնելու ընդամենը 3 տարի:
Սևակի սպանության գործով կողմնակալ և ոչ արդար դատավարությունը քննադատության է արժանացել ոչ միայն Սևակի ծնողների, այլ նաև թուրք իրավապաշտպանների և առաջադեմ գործիչների կողմից: Իսկ Աղաօղլուի 4,5 տարվա (փաստացի 3) պատժաժամկետը հստակ ցույց է տալիս, որ մերօրյա Թուրքիայում հայի սպանությունը մեծ հաշվով անպատիժ է մնում:
