Հյուրանոցատերերը հանդիպեցին Աղթամարի առաջին արարողության առիթով

Վանի նահանգապետ Մյունիր Քարալօղլուն հանդիպեց Վան քաղաքի հյուրանոցատերերի հետ` Աղթամարի եկեղեցում նախատեսվող առաջին պատարագի կապակցությամբ: Նահանգապետ Քարալօղլուն հայտնելով, որ իրենք նախապատրաստվում են սեպտեմբերի 19-ին, նաև շնորհակալություն հայտնեց «Մեր տան դռները բացում ենք Վան եկող հայերի առջև» արշավը նախաձեռնած տեղական թերթի տիրոջը:

Վալի Ալի փաշա ժողովասրահում Վանի նահանգապետ Մյունիր Քարալօղլուի նախագահությամբ տեղի ունեցած հավաքին մասնակցեցին նահանգապետի տեղակալ Հալիլ Բերքը, մշակույթի և զբոսաշրջության գծով տնօրեն Զեքի Թաշթանը և քաղաքի օթևանատների տերերն ու հյուրանոցատերերը: Նահանգապետ Քարալօղլուն ասաց, որ սեպտեմբերի 19-ին Աղթամարի եկեղեցում սպասվող պատարագին մասնակցելու են գալու ավելի մեծ թվով հյուրեր, քան կարող է ընդունել քաղաքը: Նահանգապետը պահանջեց, որ հյուրանոցները հյուրերին լավագույն հյուրընկալությունը ցուցաբերեն, ինչպես նաև` շնորհակալություն հայտնեց Ազիզ Այքաչին, որը տեղական թերթեր ՙՎանթայմսի՚ և ՙՇեհրիվանի՚ միջոցով նախաձեռնել էր «Մեր տան դռները բացում ենք Վան եկող հայերի առջև» արշավը: Նահանգապետ Քարալօղլուն ասաց նաև հետևյալը. «Կրոնական արարողությունը, որը նախատեսվում էր կատարել սեպտեմբերի 12-ին, հանրաքվեի պատճառով հետաձգվեց մինչև սեպտեմբերի 19-ը: Դպրոցները բացվելու են սեպտեմբերի 20-ին: Համալսարանները, մեր պահանջի հիման վրա, բացվելու են սեպտեմբերի 27-ին` մեկ շաբաթ հետաձգվելով: Ակնհայտ է, որ սեպտեմբերի 19-ին կրոնական արարողությանը մասնակցելու են գալու շատ ավելի մեծ թվով հյուրեր, քան կարող են ընդունել մեր քաղաքի հյուրանոցները: Դա ցույց են տալիս նաև հյուրանոցների համարների նախնական պատվերները: Մեր հյուրանոցներն ու օթևանատները ընդհանուր առամամբ ունեն 3600 մահճակալ: Միասին պետք է քննարկենք այս հարցի լուծման տարբերակները: Այս ընթացքում եղավ մի զարգացում, որը թեթևացրեց բոլորիս սրտերը: Մի քաղաքացիական նախաձեռնություն մեկնարկ տվեց «Մեր տան դռները բացում ենք» արշավին: Ես շնորհավորում եմ այն նախաձեռնողներին: Այս պահի դրությամբ հյուր ընդունելու համար գրանցվել է 500 հոգի: Մեր պատմության ընթացքում օտարի պես չենք վերաբերվել տարբեր հավատքների կամ էթնիկ խմբերի պատկանողներին: Դրա ամենավառ օրինակն էլ տեսնում ենք հին Վան քաղաքում, որտեղ մզկիթն ու մատուռը գտնվում են կողք կողքի: Այս պահին կարևորը միջոցառումը լավ կազմակերպելն է: Ձեր հյուրանոցներում ունեցեք քաղաքի մասին նյութեր, բրոշյուրներ` տեսարժան վայրերի վերաբերյալ»:

Նահանգապետարանում տեղի ունեցած ժողովը այնուհետև շարունակվեց դռնփակ:

Գյուլայ Օզեքը հաղորդում է Վանից

(DHA) Դողան լրատվական գործակալություն, 10.06.2010

Leave a Reply

Your email address will not be published. Required fields are marked *