Ցեղասպանութիւնը Ճանչցող Թուրք Փաստաբանը Անպարտ Արձակուեցաւ

ՊՈԼԻՍ, «Մարմարա».- Թուրքիոյ քաղաքական կեանքին մէջ վերջերս առնուած կարգ մը քայլեր կը փաստեն, թէ որոշ շրջանակներու մէջ խօսքի ազատութեան ոլորտէն ներս յառաջացում արձանագրուած է։ Այս մասին փաստ մըն է փաստաբան Մետենի Այհանի դատավարութենէն ետք արձակուած վճիռը։

2004ին, Թուրքիոյ բանակի սպայակոյտի ընդհանուր նախագահութիւնը դատ բացած էր Մետենի Այհանի դէմ, այն պատճառաբանութեամբ, որ ան արտասանած էր «հայերու դէմ Ցեղասպանութիւն գործադրուած է» խօսքը։

Վեց տարի շարունակուած դատին վերջաւորութեան, ատեանը Այհանի արտասանած այս խօսքն ու իր այլ խօսքերը քրէական յանցանք չնկատեց, եւ դատը փակուած հռչակեց։

Մետենի Այհան, որ փաստաբանն էր Քիւրտիստանի բանուորական կուսակցութեան ղեկավար Ապտուլլահ Օչալանի, Անգարայի փաստաբանական կաճառի 2004ի ընդհանուր ժողովին ըսած էր. «Հայերու դէմ ցեղասպանութիւն մը գործադրուած է։ Օսմանեան կայսրութիւնը 1915ին Համիտիյէ զօրախումբին եւ «Իթթիհատ թերաքքի» կազմակերպութեան հետ 1.5 միլիոն հայերու ջարդին մէջ դեր ստանձնած է։ Հալածուած եւ գեղեցիկ հայ ժողովուրդին առջեւ կը խոնարհիմ յարգանքով։ Թուրքիոյ մէջ 30 միլիոն բնակչութեամբ քիւրտ ժողովուրդին որեւէ իրաւունք չի ճանչցուիր։ Ես կը խօսիմ իբրեւ քիւրտ ժողովուրդին մէկ անդամը եւ Քիւրտիստանի մէկ հայրենակիցը։ Քիւրտերն ալ իրաւունք ունին պետութիւն մը հիմնելու եւ ես այդ իրաւունքին համար պիտի պայքարիմ մինչեւ վերջ»։

Այդ օրերուն, սպայակոյտի նախագահի տեղակալ զօր. Իլքեր Պաշպուղ Այհանի այս արտայայտութիւնները յանցանք նկատած էր: Այհանի դէմ կրնայ նոր դատ մը բացուիլ:

asbarez.com/arm/

http://www.normarmara.com/marmara.htm

Leave a Reply

Your email address will not be published. Required fields are marked *