Ներքևը` եկեղեցի, վերևը` մզկիթ

Հաթայում, որին կոչում են նաև «Խաղաղության և հանդուրժողականության քաղաք», քանի որ այստեղի փողոցներից մեկում միաժամանակ գտնվում են մզկիթ, եկեղեցի և սինագոգ, տարբեր կրոնների պատկանող պաշտամունքի վայրերը հնարավոր է տեսնել կողք կողքի կամ նույնիսկ միմյանց վրա:  

Սամանդաղ գավառին ենթակա Յողունոլուք գյուղում գտնվող հայկական եկեղեցու վրա գործում է մի մզկիթ: Սամանդաղի կայմակամ Թահսին Քուրթբեյօղլուն հայտնեց, որ շրջանում կան բազմաթիվ պատմական հուշարձաններ:  Քուրթբեյօղլուն ասելով, որ մ.թ. առաջին դարում կառուցված Թիթուս թունելից բացի` այստեղ կան նաև բազմաթիվ այլ տեսարժան վայրեր, հավելեց. «Մենք ունենք զբոսաշրջության բազմաթիվ վայրեր: Դրանցից են, օրինակ, Սուրբ Սիմոն վանքը, Հռոմեական կայսրության շրջանում կառուցված ժայռ-գերեզմանոցները և մոտ 2300 տարվա պատմություն ունեցող Մուսա ծառը: Ամեն տարի բազմաթիվ տեղացի և օտարերկրացի զբոսաշրջիկներ են գալիս մեր գավառ` այդ ամենը տեսնելու: Սակայն Յողունոլուք գյուղում գտնվող հայկական եկեղեցին և վերջինիս վրա հետագայում կառուցված մզկիթը համերաշխության քաղաք Հաթայի իրական խորհրդանիշն է»:

«Եկեղեցին պետք է վերականգնվի»

Յողունոլուք գյուղի մզկիթի իմամ Մեհմեդ Գյուլիստանը նույնպես ասաց, որ հայերի` գյուղը լքելուց հետո 1940-ական թվականներին եկեղեցու քարե շինության վրա մի մզկիթ է կառուցվել` առանց եկեղեցու ճարտարապետությանը վնաս հասցնելու: Գյուլիստանը նշելով, որ եկեղեցին և մզկիթն ունեն առանձին մուտքեր, ասաց. «Եկեղեցի ավելի շատ այցելում են հայերը: Զբոսաշրջիկները շատ են հավանում, որ երկու տարբեր կրոնների պաշտամունքի վայրերը կառուցվել են այդ կերպ` իրար վրա: Սակայն անհրաժեշտ է, որ եկեղեցին ժամ առաջ վերականգնվի»:

Թարաֆ օրաթերթ, 24.05.2010

Leave a Reply

Your email address will not be published. Required fields are marked *